Qorǵanys ministriniń orynbasary Shaih-Hasan Jazyqbaev sarbaz Erbaian Muhtardyń óliminen keiin oqiǵanyń barlyq mán-jaiy boiynsha tergeý júrgizilip jatqanyn málimdedi, dep habarlaidy ult.kz.
Senat otyrysynan keiin jýrnalisterdiń suraǵyna jaýap bergen vitse-ministr Qorǵanys ministrligi bul iske beijai qaramaitynyn aitty.
– Qazirgi ýaqytta Ulttyq ulan basshylyǵymen bolǵan jaǵdai jan-jaqty tekserilip, tergelip jatyr. Qorǵanys ministrligi óz tarapynan qajetti kómektiń bárin kórsetýde, – dedi Jazyqbaev.
Onyń sózinshe, tergeý nátijesinde kináli tulǵalar zań aiasynda jaýapqa tartylyp, tártiptik sharalar da qabyldanady.
Eske salsaq, Erbaian Muhtar 2023 jyly aýyr bas jaraqatyn alyp, eńbekke jaramsyz bolyp qalǵan edi. Ulttyq ulan ókilderi onyń dárethanada qulap jaraqat alǵanyn habarlaǵan. Alaida sarbazdyń týystary bul nusqaǵa kúmán keltirip, oqiǵanyń tolyq tergelýin talap etken bolatyn. Keiin atalǵan derek boiynsha qylmystyq is qozǵalyp, qyzmettik tekserýler júrgizildi.
Densaýlyq saqtaý ministrliginiń málimetinshe, Erbaian Muhtar Almatydaǵy Ortalyq qalalyq klinikalyq aýrýhanada jáne Astanadaǵy Ulttyq neirohirýrgiia ortalyǵynda em alǵan. Sondai-aq 2024 jyldyń tamyzynan 2025 jyldyń qańtaryna deiin Túrkiiada ońaltý kýrsynan ótken.
Alaida 2026 jyldyń maýsymynda negizgi diagnoz aiasynda infektsiialyq asqynýlar, sepsis jáne kóp aǵzalyq jetkiliksizdik sindromy damyp, 23 maýsym kúni saǵat 21:40-ta Erbaian Muhtar kóz jumdy.
Aita keteiik, sarbaz qaitys bolǵannan keiin onyń denesin sot-meditsinalyq saraptamaǵa alyp ketý kezinde týystary men politsiia qyzmetkerleri arasynda janjal týyndaǵan.
