Búgin QR Premer-Ministriniń orynbasary Eraly Toǵjanov BUU Bas hatshysynyń kómekshisi jáne BUU DB-nyń Eýropa men TMD boiynsha óńirlik biýrosynyń direktory Miriana Spoliarich Eggermen kezdesti.
Kezdesýde Qazaqstan Respýblikasy Úkimeti men BUU DB yntymaqtastyǵynyń basym baǵyttary talqylandy, dep habarlaidy "Ult aqparat" Úkimettiń baspasóz qyzmetine silteme jasap.
Kezdesý barysynda Premer-Ministrdiń orynbasary E. Toǵjanov áleýmettik baǵyttyń, onyń ishinde densaýlyq saqtaý, bilim berý jáne áleýmettik qamtamasyz etý salalary boiynsha ózara yntymaqtastyqtyń mańyzdylyǵyn atap ótti.
Pandemiia kezinde júrgizilip jatqan birlesken jumysqa erekshe nazar aýdaryldy. BUU qoldaýynyń arqasynda zamanýi meditsinalyq qurylǵylarmen jabdyqtalǵan B sanatyndaǵy 5 jedel járdem mashinasy satyp alyndy. COVID-19 virýsynyń taralý qaýpine shuǵyl den qoiý jobasy sheńberinde Qazaqstan tarapyna 190 myń meditsinalyq jiyntyq (jeke dári qobdishalary) berildi.
Spoliarich Egger hanym Qazaqstan Úkimetimen damýdyń keń spektrindegi, sonyń ishinde BUU-nyń ornyqty damý maqsattaryna qol jetkizý boiynsha qabyldanyp jatqan sharalar boiynsha ózara tyǵyz is-qimyldy atap ótti. Ol Áleýmettik kodeks jobasyn ázirleý, Qazaqstannyń tsifrlyq transformatsiia, tabiǵatty qorǵaý qyzmetin basqarý salasyndaǵy kúsh-jigeri, jasyl ekonomikaǵa kóshýge umtylysy boiynsha júrgizilip jatqan jumystaryn joǵary baǵalady.
Taraptar yntymaqtastyqty odan ári kúsheitýdiń mańyzdylyǵyn jáne BUU DB-men ulttyq jáne jergilikti deńgeilerde el damýynyń basym baǵyttary boiynsha jumysty jalǵastyrý nietin atap ótti.
Egger hanymnyń aitýynsha, BUU DB Qazaqstandaǵy negizgi transformatsiialyq úderisterdi qoldaýdy jalǵastyrady. Is-sharaǵa sheteldik taraptan Ia. Berish – Qazaqstandaǵy BUU Damý baǵdarlamasynyń turaqty ókili, V. Vremish – Qazaqstandaǵy BUU Damý baǵdarlamasynyń turaqty ókiliniń orynbasary qatysty.
