Úndistanda er adam qaryndasynyń súiegin qazyp alyp, bankke aparǵan, dep habarlaidy ult.kz.
Úndistannyń Odisha shtatynda bolǵan erekshe oqiǵa qoǵamda qyzý talqyǵa tústi. 2026 jyldyń 28 sáýirinde Keondjar aýdanynda turatyn 50 jastaǵy Adivasi Djitý qaitys bolǵan qaryndasynyń súiegin qabirden qazyp alyp, ony Maliposi aýylyndaǵy bank filialyna jetkizgen.
Belgili bolǵandai, er adam marqum qaryndasynyń jinaq shotynda qalǵan shamamen 19 300–20 000 úndi rýpiiin (shamamen 130 myń teńge) almaq bolǵan. Alaida bank qyzmetkerleri resmi ólim týraly kýálik usynylmaǵandyqtan, qarajatty berýden bas tartqan.
Adivasi Djitýdyń aitýynsha, ol qaryndasynyń qaitys bolǵanyn dáleldeý úshin súiekterin bankke aparýǵa májbúr bolǵan. Onyń sózinshe, otbasynyń ólim týraly kýálikti rásimdeýge qarjylyq múmkindigi bolmaǵan.
Jergilikti turǵyndardyń aitýynsha, Úndistannyń keibir shalǵai aýyldarynda qaitys bolýdy resmi tirkeý men tiisti qujattardy alý kóp ýaqyt pen qosymsha shyǵyndy talap etedi. Sol sebepti turmysy tómen otbasylar keide mundai rásimderdi jasamai, marqumdy birden jerleý nemese krematsiialaý jolyn tańdaidy.
Oqiǵadan keiin bank qyzmetkerleri zań talaptaryna sáikes resmi qujatsyz aqsha bere almaityndaryn málimdegen. Qazirgi ýaqytta Adivasi Djitý qajetti qujattardy rásimdeýge áreket jasap jatyr. Alaida ol qaryndasynyń esepshotyndaǵy qarajatty qashan alatyny ázirge belgisiz.
