Búgin elordada týristerge arnalǵan eQonaq atty jańa aqparattyq júieniń tanystyrylymy ótti, dep habarlaidy QazAqparat.
«Tsifrlandyrý - memleketimiz úshin basym baǵyttardyń biri. Sonyń ishinde týrizm salasy da tsifrlandyrýdy talap etedi. Aldymyzda ishki týrizmdi odan ári damytý men ony qoljetimdi etý maqsat-mindeti tur. Biz syrttan kelgen týristerdiń sany men olardyń qandai elden kelip jatqanyn bilýimiz kerek. Sonymen qatar, olardyń suranysy men týrizmniń qai salasy qyzyqtyratyny da mańyzdy. Osy maqsatta buǵan deiin «e-Tourism» tsifrlyq baǵdarlamasyn engizsek, endi «eQonaq» atty jańa aqparattyq júiesin iske qostyq. Bul jańa jobany «Kazakh Tourism» ulttyq kompaniiasy ótken jyldyń qazan aiynan bastap pilottty rejimde iske qosqan bolatyn», - dedi QR Mádeniet jáne sport ministri Aqtoty Raiymqulova aqparattyq júieniń resmi tanystyrylymynda.
Jobany ázirleýshilerdiń aitýynsha, atalǵan aqparattyq júie ishki týrizm salasyn damytýdyń 2019-2025 jyldarǵa arnalǵan memlekettik baǵdarlamasy aiasynda jasaldy.
Maqsat – ishki jáne syrtqy týristerdiń aǵynyn esepke alyp, ol boiynsha taldaý jasaý.
Sonymen qatar saiahattaýshylar men demalýshylardyń kóshin-qon qarqynyn baqylaý.
«Birinshiden eQonaq atty aqparat júiesin arqyly elge kelgen týristerdiń sanyn, deńgeiin jáne olardyń talǵamyn bilý múmkindigi týady. Ekinshiden, týristik qyzmetti ońtailandyryp, qoljetimdi jáne tsifrlyq formatta qyzmet kórsetýdi kózdeidi. Iaǵni biz júie arqyly týristerdiń demalý úshin kóbinese qai jerlerdi tańdaitynyn, qansha ýaqyt bolǵanyn anyqtaýǵa bolady. Bul ishki týrizmdi odan ári ilgeriletýde ne isteý kerek degen suraqtarǵa jaýap beredi», - deidi ol.
