Elimizde maýsymdyq tumaý jáne JRVI-diń taralý jiiligi 1,4 esege artyp otyr. Bul týraly Úkimet otyrysynda QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Jańa «Omikron» shtamynyń anyqtalýy álemdegi kóptegen elde alańdaýshylyq týdyrýda. Birqatar Eýropa eli, Singapýr, Izrail qatań shekteý is-sharalaryn qabyldap otyr. Dúniejúzilik densaýlyq saqtaý uiymynyń aldyn ala derekterine sáikes, jańa shtamm «Delta» nusqasynan da qaýipti jáne tez taralady. Sondyqtan shtammnyń elimizdiń aýmaǵyna enýiniń aldyn alýǵa baǵyttalǵan is-sharalardy qoldaýdy suraimyz. Usynylǵan shekteý is-sharalary vedmostvoaralyq komissiianyń otyrysynda qaralyp, maquldandy. Sonymen qatar biyl maýsymdyq tumaý jáne JRVI-diń taralý jiiligi 2019 jylmen salystyrǵanda 1,4 esege artyp otyr. Osyǵan orai jáne álemdegi jaǵdaidy eskere otyryp, barlyq ákimdikten sanitarlyq talaptardyń oryndalýyna baqylaýdy kúsheitýdi suraimyz», - dedi vitse-premer.
Eraly Toǵjanov birinshiden qoǵamdyq oryndarda áleýmettik qashyqtyq pen maska rejimi boiynsha túsindirme jumystaryn arttyrý qajettigin basa aitty. Bul rette monitoring toptardyń jumysyn jandandyrý qajet.
«Ekinshiden, koronavirýsqa qarsy vaktsina jáne revaktsinatsiia alýǵa shaqyrý aqparattyq jumystaryn kúsheitý óte mańyzdy. Azamattardyń vaktsina alýy úshin qolaily jaǵdai qamtamasyz etilýi tiis. Úshinshiden, ákimdikter óńirdegi infektsiianyń taralý deńgeiine kúndelikti taldaý júrgizip otyrýy qajet. Bul úshin epidemiologiialyq ahýaldy baqylaý jónindegi óńirlik shtab jumystaryn kúsheitýdi suraimyz», – dedi ol.
