Eýropalyq odaq COVID-19 koronavirýsynyń órshýine qarsy kúreske 232 mln eýro bóledi, dep habarlaidy "Ult aqparat" Eýrokomissiianyń habarlamasyna silteme jasap.
«Virýsty juqtyrǵandar sanynyń artýyna bailanysty qoǵamdyq densaýlyq saqtaý birinshi kezektegi basymdyqqa ie bolady. Eýropadaǵy, Qytaidaǵy nemese basqa elderdegi daiyndyqty artyrýda halyqaralyq qaýymdastyq birge jumys isteýi kerek», - dep keltirilgen habarlamada Eýrokomissiia basshysy Ýrsýla fon der Liaienniń sózi.
«Bizdiń jańa kómek paketimiz Dúniejúzilik densaýlyq saqtaý uiymyna qoldaý kórsetedi jáne densaýlyq saqtaý júiesi álsiz elder nazardan tys qalmaýy úshin maqsatty qarjylandyrýdy qamtamasyz etedi. Maqsatymyz – bul aýrýǵa jahandyq deńgeide toitarys berý», - dedi antikrizistik basqarý jónindegi eýrokomissar Ianez Lenarchich.
Bólingen qarajattyń 114 mln eýrosy – DDU sharalaryn qoldaýǵa, 15 mln eýrosy – Afrikadaǵy seriktes elderge, 90 mln eýrosy – farmatsevtik kompaniialarǵa jáne 10 mln eýro epidemiologiia, diagnostika jáne terapiia salalaryndaǵy zertteýge, sondai-aq aýrýdyń taralýyn toqtatýǵa bólinedi.
Taǵy 3 mln eýro Qytaidyń Ýhan qalasynan Eýropalyq odaq memleketteriniń azamattaryn qaitarýǵa baǵyttalady. Eýrokomissiia EO elderiniń repatriatsiiaǵa arnalǵan kólik shyǵyndarynyń 75% jabady.
