Eýropa Odaǵynyń elderi týristerge qatysty erejelerge ózgerister engizip jatyr, dep habarlaidy Euronews.
Eýropaǵa baratyn týrister qandai da bir elge barý úshin udaiy ózgerip otyratyn erejelerdi baqylap otyrýy qajet. Germaniia jeksenbiden bastap ekpeni tolyǵymen almaǵan týristerden koronavirýsqa testileýdiń teris nátijesi men jaqynda aýyrǵany týraly anyqtama talap ete bastady. Bul on eki jastan asqan barlyq adamǵa, sonymen qatar elge avtokólikpen kelýshilerge de qatysty.
Berlinde tamyzdyń alǵashqy kúnderi júzdegen demonstrant sanitariia shekteýleri men vaktsinalaýǵa qarsy narazylyq aktsiiasyna qatysty. Ony ótkizýge úkimet ruqsat bermegen. Keibir adamdardyń qolynda «Erkindik», «Korona - diktatýraǵa jol joq» degen jazýy bar plakattar boldy. Demonstranttar toby politsiiamen qaqtyǵysty. Nátijesinde tártip saqshylary birneshe adamdy ustady.
Daniia shekteý sharalaryn jeńildetip jatyr. 500-den joǵary orny bar teatrlar men kinoteatrlarǵa barý úshin endi «densaýlyq pasporty» talap etilmeidi.
Portýgaliiada birinshi tamyzdan bastap epidemiologiialyq ahýaldyń nasharlaýyna bailanysty keibir aýdandarda engizilgen komendant saǵaty alynyp tastaldy. Dúkenderge, meiramhanalar men barlarǵa túngi ekige deiin jumys isteýge ruqsat etildi.
Frantsiianyń Marsel qalasynda «Orandj Velodrom» stadionyna otyz myńǵa jýyq kórermen qaita oraldy. Munda «Olimpik Marsel – Viliarreal» joldastyq matchy ótti.
