Elektr energiiasyna tarifti baiý úshin kóterýdi ótinip otyrǵanymyz joq. Bul týraly Qazaqstan energetikteriniń salalyq kásipodaǵynyń tóraǵasy, «Samuryq-Energo» AQ ombýdsmeni Orazbek Bekbas aitty, dep habarlaidy QazAqparat.
«Elektr energiiasyna tarifti qysyp ustap turý saldarynan salanyń jaǵdaiy jyldan-jylǵa qiyndap bara jatyr. Búginde elimizde jylý men elektr energiiasyn óndirý, taratý salasyndaǵy mekemelerdiń sany 100-den asady. Tarif tómen bolýy sebepti olarǵa investitsiia kelmei jatyr. Stansalarǵa kúrdeli jóndeý jumystaryn júrgizý úshin de qarjy túspei tur. Bizdegi negizgi qural-jabdyqtardyń tozýy 60 paiyzdan asyp barady. Jylý elektr stansalaryndaǵy bý týrbinasy, bý qazandary, diirmen, usaqtaǵysh syndy jabdyqtar ábden tozǵan. Olardy jamaý-jamaý qylǵannan ne shyǵady? Sonyń saldarynan apattar jiilep tur. Jaqynda ǵana Temirtaý jylý elektr stansasynda apat oryn alǵany belgili. Shaǵyn stansalar, elektr jelileri baiaǵyda paidalanýǵa berilgen. Olardy da aiyrbastaý qajet», - dedi kásipodaq tóraǵasy.
Onyń atap ótýinshe, búginde elimizdiń jylý elektr energiiasyn óndirý jáne taratý salasynda 102 myń adam jumys isteidi. Olardyń ortasha jalaqysy 217 135 teńgeni quraidy.
«Qazaqstan boiynsha ortasha jalaqy - 233 136 teńge. Iaǵni, ekonomikanyń negizi sanalatyn salada eńbek etetin energetikterdiń eńbekaqysy elimizdegi ortasha jalaqydan 6,8 paiyzǵa tómen. Aitalyq, qarjy-saqtandyrý salasynyń ortasha jalaqysy 422 myń teńge bolsa, munai-gaz salasynda bul kórsetkish 472 myń teńgeden asyp jyǵylady. Demek, atalǵan sala qyzmetkerleri energetikterden 2 ese joǵary jalaqy alady. Sonyń saldaryna saladan mamandar ketip jatyr», - dedi ol.
Sonymen qatar «Samuryq-Energo» AQ ombýdsmeni elektr energiiasynda ádiletti tarif bolýy kerektigin basa aitady.
«Jaǵdai qiyn, salanyń joǵaltyp alýymyz múmkin. Tarifti biz baiý úshin kóterýdi ótinip otyrǵanymyz joq. Ádiletti tarifi bolýy kerek, sala jumysshylarynyń jalaqysy da ádiletti bolýy tiis. Energiiaǵa tarif kóterilse ekonomika nyǵaia túsedi. Halyqqa tarif kóterilmeidi, burynǵydai qalady. Halyq tóleitin tarifti biznes pen biýdjet tóleidi. Ol rettelip otyrady», - dedi Orazbek Bekbas.
Aita keteiik, Energetika ministrligi elektr energiiasyna arnalǵan tarifterdi kóterý týraly buiryǵynyń jobasyn jariialady. Qujat naýryzdyń 26-syna deiin talqylaýǵa shyǵaryp otyr.
