Elimizdegi bilikti energetikter kórshi elderge ketip qalyp jatyr, dep habarlaidy "Ult aqparat".
Qazaqstandyq energetikterdiń salalyq kásipodaǵynyń tóraǵasy Orazbek Bekbas energetika salasyndaǵy jumysshy mamandardyń ailyǵy sońǵy 20 jyldan beri ózgermegenin aitady.
«Búginde Qazaqstandaǵy jylý-elektr energiiasyn óndiretin jáne taratatyn kásiporyndarda áleýmettik turaqtylyqqa qater tóndiretin ahýal qalyptasyp otyr. Buǵan keiingi 20 jyldan beri ózgermei kele jatqan eńbekaqy deńgeiiniń tómendegi ákeldi. Ulttyq statistikanyń málimetteri boiynsha, 2020 jyldyń tórtinshi toqsanynda eldegi ortasha eńbekaqy kólemi 233 136 teńge bolǵanda energetikaterdiń ailyǵy 6,86% tómen bolǵan» - deidi kásipodaq tóraǵasy.
Ol, sondai-aq, bulai jalǵasa berse, bilikti mamandardyń bári kórshi elderge oiysyp ketýi múmkin degen qaýpin bildirdi.
«Mysaly «Atyraý-Jaryq» AQ-daǵy 1311 jumysshynyń 98-i jumystan óz erkimen ketken. Qostanai jylý-energetikalyq kompaniiasyndaǵy 753 adamnyń 256-sy basqa jumysqa aýysqan. «SevKazEnergo» kásipornyndaǵy 1150 jumysshynyń 191-i Reseiden nápaqa tabýǵa ketken», - dedi Orazbek Bekbas.
Kásipodaq tóraǵasy kórshi elderde energetikterge degen kózqaras basqasha ekenin de aitty.
«Eńbekaqynyń tómendigi kadrlardyń jalaqysy joǵary basqa salalarǵa, tipti kórshi memleketterge de ketýine alyp keledi. Mysal retinde, Reseidegi energetikterdiń jalaqysy jalpy eldegiden 21%-ǵa joǵary. Belarýs Respýblikasynda bul kórsetkish 28%, al Qyrǵyz Respýblikasynda 44%-ǵa joǵary», - dep túiindedi sózin Orazbek Bekbas.
