QR Energetika ministri Bolat Aqsholaqov eldiń ońtústik óńirlerinde elektr qýatynyń úzilýine bailanysty júrgizilgen tekserýdiń alǵashqy qorytyndysyn jariialady, dep habarlaidy QazAqparat.
«Ońtústik óńirlerdiń tutynýshylaryn elektrmen jabdyqtaýyn buzýǵa ákelip soqqan «KEGOC» AQ elektr jelilerinde tehnologiialyq buzýshylyqtyń týyndaýynyń sebepterni anyqtaý úshin QR Energetika vitse-ministriniń basshylyǵymen 2022 jylǵy 26 qańtarda arnaiy komissiia quryldy.
Komissiia quramyna Qazaqstan Respýblikasy Energetika ministrliginiń, «KEGOC» AQ jáne Almaty energetika jáne bailanys ýniversitetiniń quzyretti ókilderi engizildi», - dedi ministr.
Onyń aitýnysha, komissiia jumysynyń nátijeleri boiynsha tehnologiialyq buzýshylyqtyń birneshe sebebi anyqtalǵan.
«Qýaty 500 kV bolatyn birinshi shinanyń differentsialdyq qorǵaýynyń shamadan joǵary jumys isteýine bailanysty Syrdariia JES-iniń jumysy buzyldy jáne ózbek energiia júiesinde 2105 MVt jiyntyq generatsiiany joǵalta otyryp, 500 kV irgeles jeliniń óshýine ákep soqty. Ózbek energiia júiesinde paida bolǵan qýat tapshylyǵy «Qazaqstannyń Soltústik-Shyǵys-Ońtústik» tranzitindegi qýattyń 2105 MVt shamasyndaǵy artylýyna alyp keldi. Sonyń saldarynan shamadan tys júktemege bailanysty dinamikalyq ornyqtylyq buzylyp, qurylǵylardan ajyratyldy», - dedi vedomstvo basshysy.
Ministrdiń sózine qaraǵanda, komissiia jumysynyń qorytyndysy boiynsha tiisti sheshimder qabyldanyp otyr.
«Tehnologiialyq aqaý týyndaǵan sáttegi, oqshaýlaý jáne joiý kezindegi personaldyń is-áreketine, relelik qorǵaý jáne avariiaǵa qarsy avtomatika jumysyna baǵa berildi. Sondai-aq, osyndai tehnologiialyq buzýshylyqtardy boldyrmaý boiynsha uiymdastyrýshylyq jáne tehnikalyq is-sharalar ázirlendi», - dedi Bolat Aqsholaqov.
