Qazaqstanda gaz baǵasy qymbattaǵan jaǵdaida qarapaiym halyqtyń qaltasyna túsetin salmaqty jeńildetý úshin tutynýshylardy birneshe sanatqa bólý josparlanyp otyr. Bul týraly QR Energetika ministri Bolat Aqsholaqov Úkmiet otyrysynan keiin BAQ ókilderine bergen suhbatynda aitty, dep habarlaidy QazAqparat.
«Bul jerde tutynýshylardy toptarǵa bólý týraly oilaýymyz kerek. Birinshi top – qarapaiym halyq pen áleýmettik turǵyda qorǵalmaǵan turǵyndar. Biraq gazdyń shynaiy naryqtaǵy baǵasyn tólei alatyn tutynýshylar toby bar. Bul – eksportqa baǵdarlanǵan, tabysyn myǵym valiýtamen alatyn kásiporyndar. Mainerler de gazǵa jaqsy baǵa tólei alady. Sondai-aq, kommýnaldyq jáne áleýemttik kásiporyndardy jeke topqa bólý kerek shyǵar», - dedi Bolat Aqsholaqov.
Onyń sózinshe, gaz baǵasy orta eseppen 60% óspek.
«Biz qazir esep júrgizip jatyrmyz. Otasha san 60% dep otyrmyz. Halyqtyń keibir toptary úshin gaz quny ósedi. Sondai-aq, óndiristik kásiporyndar úshin 2 ese qymbattaýy múmkin. Qarapaiym halyq úshin basqa baǵa bolady. Bul máselede segmentke bólip, qolymyzda bar múmkindikterge qarai sheshim qabyldaimyz. Bul sanat úshin baǵa aitarlyqtai ósedi dep oilamaimyn. Biraq ónimdi arzanǵa satý árdaiym únemdeýge jol ashady deýge kelmeidi. Biz tek tujyrymdar jasap jatyrmyz. 180 kún berilgenin bilesizder. Áli oilanýǵa ýaqyt bar», - dedi Energetika ministri.
