QR Energetika ministri Maǵzum Myrzaǵaliev janar-jaǵarmai baǵasynyń qymbattaýyna qatysty pikir bildirdi, dep habarlaidy QazAqparat.
«Bizdiń aýyl sharýashylyǵy taýaryn óndirýshilerge jylyna 800 myń tonna janarmai kerek. Árine, egis jáne oraq naýqandary bar. Artylǵan kólemge qatysty aitsaq, birshama jaqsy mólsher bar. Qyrkúiek aiynda mólsherlemeler tómendei bastady da, tapshylyq paida boldy. Qazan aiynan bastap artylǵan kólemniń mólsheri óse bastady jáne búginde bizde 240 myń tonnadan asyp otyr. Bul janarmaimen qamtamasyz etýde eshqandai qiyndyqtar boldyrmaý úshin jetkilikti kólem», - dedi Maǵzum Myrzaǵaliev ortalyq kommýniatsiialar qyzmetinde ótken brifinginde.
Sondai-aq, ol, janar-jaǵarmai baǵasy munaidyń baǵasyna tikelei bailanysty ekenin eske saldy.
«Baǵaǵa keletin bolsaq, meniń oiymsha, búgingi tańda janar-jaǵar mai baǵasynyń qymbattaýyna negiz bolatyn úlken alǵysharttar joq. Degenmen, janar-jaǵarmai baǵasynyń qalyptasýyna munai baǵasy da áser etetinin aitý kerek. Keiingi aptada bir barrel munaidyń baǵasy 10% nemese 71 dollardan 78 dollarǵa deiin óskenin kórip otyrmyz. Sondyqtan janar-jaǵar mai baǵasyn boljaý – berekesiz sharýa. Óitkeni biz munai baǵasynyń qalai bolatynyn bilmeimiz», - dep túsindirdi Energetika ministri.
