Jýrnalistiń saýalyna jaýap bergen ministr 180 kún ishinde saýda erejeleri men suiytylǵan gazdyń baǵa júiesin reformalaý ázirlenetinin atap ótti.
"El basshylyǵynyń tapsyrmasy boiynsha qańtardyń basynda, shynymen de, suiytylǵan gazdyń baǵasyn 180 kúnge memleket baqylaýyna alý týraly sheshim qabyldanǵan bolatyn. Qazir onyń baǵasy 50 teńgeden 75 teńge aralyǵynda tur. Iaǵni, eń shalǵai eldi mekenderde baǵanyń shegi 75 teńge bolsa, munai óńdeý zaýyty bar Mańǵystaý oblysynda 50 teńge. Biraq, belgilengen 180 kúnniń ishinde janar-jaǵarmai siiaqty suiytylǵan gazdyń da baǵasyn qalyptastyrý júiesi men satý erejelerin reformalap shyǵýymyz kerek. Bizdiń oiymyzsha, zertteýler kórsetkendei, janar-jaǵarmai siiaqty suiytylǵan gazdyń da naryq tizbeginde "ónimsiz deldaldar" bar", - dep túsindirdi Aqsholaqov OKQ onlain-brifinginde.
Onyń aitýynsha, suiytylǵan gazdyń naryq tizbeginde menshiginde ne gaz quiý stansasy, ne gaz jinaqtaý stansasy joq oiynshylar bar. Soǵan qaramastan gaz taratý júiesinde otyr.
"Biz osyndai oiynshylardy tizbekten alyp tastaityn shyǵarmyz. Iaǵni, tek naqty gaz óndirýshiler, gaz quiý stansalary nemese úilerge qajet gazdy jinaqtaityn stansalary bar oiynshylar ǵana qalady. Bul bizge tipti osy 50 teńgelik baǵanyń ishinde naryq tizbegindegi qatysýshylardyń kiristiligin qaita retteýge múmkindik beredi. Iaǵni, gazdy satýshylar men óndirýshilerdiń arasyndaǵy tabys teńgerimi qaita qaralady. Negizi gaz óndirýshilerdiń tabysy kóbirek bolýy kerek. Óitkeni bizdiń zaýyttardaǵy suiytylǵan gazdyń ózindik quny tonnasyna 100 myń teńgege deiin jetýi múmkin. Bul bir litr gazdy óndirýge ǵana shamamen 50 teńge ketedi degen sóz. Ázirge bul zaýyttar belgilengen 180 kúnde shyǵynmen jumys isteidi", - dedi Bolat Aqsholaqov.
Ministrdiń aitýynsha, gaz óndirýmen ainalysyp, janarmai quiý beketteri arqyly satatyndar qalýy múmkin. Vedomstvo basshysy bul gaz satýshylar men óndirýshiler arasynda tabysty qaita bólýge múmkindik beretinin jáne ázirge bul zaýyttar 180 kún boiy shyǵynǵa batyp jumys isteitinin atap ótti.
