Elimizde dizel otynyn tutyný kólemi rekordtyq deńgeige jetti. Qazaqstanda dizel otynyn tutyný men onyń baǵasyna qatysty Energetika ministri Maǵzum Myrzaǵaliev túsinik berdi, dep habarlaidy QazAqparat.
«Eldegi dizel otynyn tutyný kólemi týraly aitatyn bolsaq, ol tarihi kórsetkishke jetti. Biyl tamyz-qyrkúiek ailarynda shamamen 520-540 myń tonna dizel otyny paidalanylǵan. Bul - elimizde buryn-sońdy bolmaǵan rekordtyq kórsetkish», - dedi Maǵzum Myrzaǵaliev elordada ótip jatqan «KIOGE-2021» halyqaralyq munai jáne gaz kórmesinde tilshilerdiń suraǵyna jaýap bere otyryp.
Sondai-aq, ministr elimizdegi janar-jaǵarmai baǵasyna qatysty túsinikteme berip ótti.
«Aita ketý kerek, dizel otyny jáne basqa da janar-jaǵarmai túrleriniń baǵasy rettelmeidi. Baǵany suranys pen usynysqa súiene otyryp naryq retteidi. Sondyqtan da bizdiń ministrliktiń baǵany belgileýge esh qatysy joq. Búginde munai baǵasynyń óskeni baiqalady. Bir-eki kúnniń ishinde barreli 78 dollardan 82 dollarǵa deiin ósti. Árine, munai baǵasynyń ózgerýi janar-jaǵarmaidyń baǵasyna áser etedi», - deidi ol.
