Onlain platformalar arqyly (Iandeks Taksi, Iandeks GO jáne t.b.) jumys isteitin taksister úshin arnaiy salyq rejimi engiziledi. Bul týraly Májilistegi Úkimet saǵatynda QR Áleýmettik kodeksiniń jobasyn tanystyrý kezinde Eńbek jáne halyqty áleýmettik qorǵaý ministri Tamara Dúisenova aitty, dep habarlaidy QazAqparat.
«Onlain platformalar arqyly (Iandeks Taksi, Iandeks GO jáne t.b.) jumyspen qamtylǵan azamattar úshin arnaiy salyq rejimi engiziledi. Bul rette salyq agentteri rólinde onlain platformalar operatorlaryn aiqyndaý usynylady. Olar osynda jumys isteitin azamattar atynan tiisti tólemderdi júrgizedi», - dedi vedomstvo basshysy.
Sonymen qatar ol Áleýmettik kodeks jobasynda áleýmettik táýekelderden saqtandyrý jáne azamattardy zeinetaqymen qamsyzdandyrýǵa máselesi eskerilgenin aitty.
«5 áleýmettik táýekelden saqtandyrýdy kózdeitin qoldanystaǵy saqtandyrý júiesi halyqaralyq standarttarǵa jáne naqty ekonomikalyq jaǵdailarǵa sai keletin júie retinde saqtalady. Degenmen onyń maqsatty mindeti ózgeriske ushyraidy. Júie tek áleýmettik tólemder tóleýge ǵana baǵyttalmai, eń aldymen, ol azamattardy resmi túrde jumyspen qamtylýǵa yntalandyrýdy kózdeidi. Osy oraida Salyq kodeksine shaǵyn biznestiń jaldamaly jumyskerleri úshin biryńǵai mindetti tólemdi engizýge qatysty ózgerister engiziledi. Olar úshin salyq júktemesi endigi jyly 33 paiyzdan 20 paiyzǵa deiin tómendeidi», - dedi Dúisenova.
