Foto: Shutterstock
Ozon qazaqstandyq satyp alýshylar úshin keiingi tólem qyzmetin iske qosty. Ol "Fashion" sanatyndaǵy taýarlardyń kópshiligin Ozon tapsyrys berý pýnktterinde kiip-ólshep kórgennen keiin tólei alady degen sóz. Bul týraly Ult.kz habarlaidy.
"Jańa qyzmet klientterdiń tájiribesin edáýir jaqsartyp, tapsyrystardyń artýyna ákeledi", -delingen habarlamada.
Keiingi tólem qyzmeti Qazaqstan turǵyndaryna qoljetimdi jáne taýarlardy Ozon pýnktterinen tapsyrys berý kezinde qoldanylady.
Jańa qyzmet kiim, aiaq kiim jáne keibir kerek-jaraqtardy: bas kiim, qolǵap, beldik, galstýk, áiel sómkeleri, erlerge arnalǵan barsetkalar jáne basqa da taýarlardy qosa alǵanda, Fashion sanatynyń 80%-na deiin qamtityn arnaiy "Alǵannan keiin tóleý" belgisi bar taýarlarǵa júredi. Jalpy, bul qyzmet 15 millionnan astam taýarǵa qoldanylady.
Keiingi tólem qyzmetin paidalaný úshin, Respýblika turǵyndary tapsyrys berý kezinde "Alǵannan keiin tóleý" ádisin tańdap, bank kartasyn kórsetýi qajet: qarajat Ozon pýnktinde taýardy satyp alý rastalǵannan keiin ǵana esepten shyǵarylady. Tapsyrysta keiingi tólem sanatyndaǵy taýarlarmen birge basqa da taýarlar bolǵan jaǵdaida, olar bólek tólenedi: aldyn ala tólem júiesi bar taýarlardyń quny birden esepten shyǵarylady, al keiingi tólem qyzmeti tapsyrysty alǵannan keiin júzege asady.
Alǵannan keiin tóleýge bolatyn taýarlardyń jalpy quny satyp alýshynyń marketpleispen ózara árekettesý tarihyna bailanysty. Keiingi tólem qyzmetiniń bazalyq limiti 100 000 teńgeni quraidy jáne satyp alynǵan árbir tapsyryspen ulǵaiyp otyrady.
