Ortalyq jáne jergilikti atqarýshy organdardyń basshylary biýdjet qarajatyn ýaqytyly jáne sapaly oryndalýyn baqylaýda ustaýy qajet. Bul týraly búgin Úkimet otyrysynda QR Premer-Ministri Asqar Mamin aitty, - dep habarlaidy "Ult aqparat".
«8 sáýirde Prezident Qasym-Jomart Toqaev «2020 jylǵa arnalǵan respýblika biýdjetin naqtylaý týraly» Jarlyqqa qol qoidy. Ol ekonomika ósimin saqtaý jáne yntalandyrý úshin daǵdarysqa qarsy sharalardy iske asyrýǵa jáne memlekettiń barlyq mindettemelerin oryndaýǵa baǵyttalǵan. Qarajatty ekonomikanyń naqty sektorlaryna der kezinde jetkizýdiń mańyzy zor. Sondyqtan ortalyq jáne jergilikti atqarýshy organdardyń basshylary biýdjet qarajatyn ýaqytyly jáne sapaly oryndalýyn baqylaýda ustaýy qajet», - dedi Úkimet basshysy.
Onyń atap ótýinshe, Úkimet álemdik jáne óńirlik ekonomikanyń syn-qaterlerine jaýap beretindei daǵdarysqa qarsy sharalar qabyldap, iske asyryp jatyr. «Jumyspen qamtý» jol kartasy bekitildi. Ol 7 myńnan astam infraqurylymdyq jobany iske asyrýǵa jáne shamamen 250 myń jańa jumys ornyn qurý arqyly jumyspen qamtýǵa baǵyttalǵan.
«Áleýmettik, injenerlik jáne kólik infraqurylymy, kommýnaldyq sharýashylyq baǵyttary boiynsha 600 jańa nysan salý kózdelgen. Birqatar memlekettik baǵdarlamany, onyń ishinde «Nurly jol», «Nurly jer» baǵdarlamalaryn qurylysty keńeitý boiynsha qarjylandyrý ulǵaityldy. Shaǵyn jáne orta biznes kásiporyndaryn salyqtyq yntalandyrý boiynsha keshendi sharalar qabyldandy», - dedi Asqar Mamin.
Premer-Ministr «Qarapaiym zattar ekonomikasy» baǵdarlamasyn jeńildikpen kreditteý 1 trln teńgege deiin keńeitilgenin aitty.
«Qajetti sharalar qabyldandy. Endi óńirler qarqyndy jumys isteýi kerek. Barlyǵy memlekettik organdardyń tiimdi jáne úilesimdi jumysyna bailanysty. Premer-Ministr orynbasarlaryna osy máselelerdi óz baǵyttary boiynsha baqylaýda ustaýdy tapsyramyn», - dedi Úkimet basshysy.
