Foto: ashyq derekkóz
Nesiesin tólei almai júrgen azamattarǵa qaryzyn bes jylǵa deiin shegerý múmkindigi beriledi. Ol úshin azamat sotqa ótinish berýge tiis. Al quzyrly organ aryz túskennen keiin 10 jumys kúni ishinde ótinish berýshige jaýap berýi mindetti, dep habarlaidy 31-arnanyń Informbiýro jańalyqtar baǵdarlamasy.
"Azamattardyń tólem qabiletin qalpyna keltirý jáne bankrottyǵy týraly" zańǵa sáikes nesiesin tólei almaǵan boryshkerler 5 jylǵa deiin qaryzyn keiinge shegere alady. Biraq bul kez kelgen adamǵa berile bermeidi. Tek birneshe mikroqarjy uiymdary men bankten aqsha alyp, qaitara almai júrgen jandar ótinish bere alady. Sondai-aq jalaqysy óte az, ózine jetpeitin adam bolýǵa tiis", – deidi qarjy ministrliginiń ókili.
Nesieni keiinge shegerý úshin aldymen turǵylyqty jeri boiynsha sotqa jazbasha nemese elektrondy túrde ótinish qaldyrý kerek. Ol úshin kreditorlardyń talaptaryn oryndai almaitynyńyzdy, iaǵni tólei almaitynyńyzdy rastaý qajet. Odan keiin nesie somasy kórsetiledi. Atyńyzda qandai múlik bar ekeni, iaǵni úi nemese kólik rásimdelgeni týraly aqparat ta beriledi. Óitkeni tólem qabiletin qaita qalpyna keltirgen kezde jalpy qaryz mólsheri múlik qunynan az bolýy kerek jáne turaqty tabys bolýy shart.
"Qalpyna keltirý jospary qarjy basqarýshysymen birlesip ázirlenedi jáne sotta bekitiledi. Ol úshin eki jaqtyń da, iaǵni boryshker men qarjy uiymynyń kelisimi qajet. Aita keteiik, boryshkerdiń ótinishi qabyldanǵan jaǵdaida qaryzynyń ústinen qosylatyn paiyz toqtatylady. Jańa nesie berilmeidi", – dedi qarjy ministrliginiń MKK dármensiz boryshkerlermen jumys basqarmasynyń basshysy Merýert Sisembaeva.
