Qazaqstan men Resei Baiqońyrdy 2050 jylǵa deiin jaldaý kelisim-shartyna 1994 jyly qol qoiǵany belgili. Máskeý Baiqońyrdy jaldaý aqysy retinde bizge jylyna 115 million dollar tóleidi. Dese de jaldaý bar da, jerin jalǵa alyp otyrǵan eldiń zańy men halqynyń talaptaryn nazarǵa alý bar. Baiqońyr jaldaýshylary keide ózderin Qazaqstandaǵy kishkentai Resei siiaqty ustaityny jasyryn emes.
Onyń ústine zańdar men jalaqy, tólemder arasyndaǵy aiyrmashylyqtar osy aimaq halqynyń turmys-tirshiligine, áleýmettik jaǵdaiyna kádýilgidei áseri bar. Basqa reseilik mekemeler tárizdi Baiqońyrdyń dárigerleri de Resei zańymen ómir súrip, Resei tarifterimen tólemder tóleitin.
«Osy kezge deiin qoldanystaǵy zańǵa sáikes Baiqońyr ailaǵynda turatyn Qazaqstan azamattary meditsinalyq kómekti tek reseilik meditsinalyq uiymdardan Resei Federatsiiasynyń zańnamasy boiynsha alyp kelgen bolatyn. Bizdiń azamattarymyzǵa kórsetilip jatqan meditsinalyq qyzmet Qazaqstanda qarastyrylǵan tegin meditsinalyq kómektiń kepildendirilgen kólemine sáikes kelmeitin. Sondyqtan da Baiqońyr qalasynda respýblikalyq biýdjet esebinen Qyzylorda oblystyq meditsina ortalyǵynyń filialy bolyp tabylatyn emhana salyndy. Ol 2016 jyldyń tamyz aiynan bastap jumys jasap keledi. Alaida bul emhana búgingi kúnge deiin tolyqqandy meditsinalyq járdem kórsete almai keledi, óitkeni, bul emhanada tek josparly túrde ǵana meditsinalyq kómek kórsete alady». Senattyń jalpy otyrysynda eki el úkimetteriniń arasyndaǵy Reseidiń «Baiqońyr» keshenin jalǵa alý jaǵdaiynda Baiqońyr ǵarysh ailaǵynyń personalyna, Baiqońyr qalasynyń, Tóretam jáne Aqai kentteriniń turǵyndaryna meditsinalyq qyzmet kórsetý tártibi týraly kelisimge ózgerister engizý týraly hattamany ratifikatsiialaý barysynda sóz alǵan senator Murat Baqtiiaruly osylai dedi.
Búgingi talqyǵa túsip otyrǵan hattama ratifikatsiialanǵan jaǵdaida Baiqońyr ailaǵynda jumys jasaityn azamattarymyz ben olardyń otbasyna kórsetiletin kómektiń aýqymy da, sapasy men qoljetimdiligi de artady, - degen senator Úkimettiń jáne tiisti ministrliktiń nazaryn ózekti, tez arada sheshimin tabýǵa tiis mynadai máselege aýdardy.
Densaýlyq saqtaý ministriniń 16.09.2015 j. №725 buiryǵy boiynsha alǵashqy meditsinalyq-sanitarlyq kómek kórsetiletin Qyzylorda oblysynyń densaýlyq saqtaý sýbektilerine adam basyna bekitilgen tarif aiyna 683 teńgeni quraidy. Júieli jan basyna shaqqandaǵy normativ (KPN) boiynsha ambýlatorlyq-emhanalyq kómek kepildik berilgen tegin meditsinalyq kómek kólemi aiasynda respýblikalyq biýdjetten beriledi jáne onyń ishinde barlyq kommýnaldyq shyǵyndar bar. Alaida, Baiqońyr qalasynda kórsetiletin kommýnaldyq qyzmet Resei Federatsiiasynyń bekitken tarifterimen tólenedi. Kommýnaldyq qyzmet quny Qyzylorda oblysynyń tarifterimen salystyrǵanda birneshe ese qymbat. Mysaly: sýyq sýdyń 1 tekshe metri Qyzylorda oblysynda 95 teńge bolsa, Baiqońyrda 479 teńge – 5 ese qymbat, jylý oblysta 1 Gkal 14,0 myń teńge, Baiqońyrda 56,6 myń teńge – 4 ese, elektr energiiasy 1 kvt-i 25,3 teńge bolsa, Baiqońyrda 44 teńge – 1,7 ese qymbat, kanalizatsiia 1 tekshe metri 159,6 teńge bolsa, Baiqońyrda 574 teńge – 3 ese qymbat. Nátijesinde 2017 jyly Baiqońyr qalasyndaǵy emhana 68 million teńge shyǵynǵa batsa, osy jyldyń qańtar-aqpan ailarynda 30 million shyǵynmen aiaqtady, dedi senator Murat Baqtiiaruly.
Sondai-aq, Senat depýtaty densaýlyq ministrine Baiqońyr qalasynyń erekshe statýsyn eskere otyryp, adam basyna shaqqandaǵy normativke tiis koeffitsent qosýdyń joldaryn jáne osy emhanada jumys jasaityn qyzmetkerlerdiń jalaqysyna ekologiialyq apat aimaǵyna beriletin qosymsha aqsha bólýdiń joldaryn qarastyrýdy da amanattady.
Ádilbek Qaba
