Elimizde endi baǵdarshamnyń sary belgisi janyp turǵan kezde jolda júrýge tyiym salynady. Bul týraly Eýraziia birinshi arnasy habarlaidy.
Endi Sergek kameralary baǵdarshamnyń sary belgisinde júrgen kólikterdi anyqtap, júrgizýshilerge aiyppul salady. Óitkeni jol apattarynyń kóbi sary belgi janǵanda bolady.
Ázirge tyiym eldiń eki iri qalasy – Astana men Almatyda bolady.
"Baǵdarshamnyń sary belgisi qozǵalysqa tyiym salady, al jypylyqtaǵan jasyl belgi endi tyiym salý belgisiniń iske qosylatynyn eskertedi. Mundai zań buzýshylyqtar kameraǵa jazylyp, kólik iesine avtomatty túrde aiyppul salynady", – dedi Astana politsiia departamenti.
Elimizdiń úshinshi megapolisi Shymkentte ázirge mundai tártip joq. Biraq politseiler sáýir-mamyr ailarynda shymkenttik júrgizýshilerge de osy úshin aiyppul salynatynyn aitty.
Endi baǵdarshamnyń sary túsinen ótkenderge 36 920 teńge aiyppul salynady, al 1 jyl ishinde osy zańbuzýshylyqty qaitalasa, aiyppul somasy úsh ese ósip, 110 760 myń teńge tóleidi.
Bul jańashyldyqqa turǵyndardyń kózqarasy ártúrli. Biri muny orynsyz dep eseptese, endi biri durys dep baǵalady.
"Bul qajet emes. Qalada qazirdiń ózinde keptelister bar. Keide kóshe qiylysynda kepteliste qalsańyz, baǵdarshamnyń sary belgisinde burylýǵa týra keledi", – deidi astanalyq Rýstam.
"Men bul zańmen kelisemin, óitkeni sonyń kesirinen kóptegen adamdar jol apatyna ushyraidy. Turǵyndar asyǵys, eshkimge jol bergisi kelmeidi. Qazir jolda júrý mádenieti tómendedi", – deidi Astananyń turǵyny.
Avtokólik zańgeri Rýslan Janpeiisov sary belgiden ótýge tyiym burynnan baryn aitady.
"Jasyl belgi qozǵalysty bildiredi, al sary belgide júrgizýshi qozǵalysty aiaqtap, toqtaidy, bul ereje kópten beri kúshinde. Al bul úshin aiyppuldyń engizilýi jolda júrý mádenietine oń áser etedi dep oilaimyn", – dedi ol.
