Enbek.kz portalynda jumys izdeýshilerge ózderin jumys berýshilerdiń aldynda kórsete bilýge, al kompaniialarǵa neǵurlym qolaily qyzmetkerdi jyldam tabýǵa bolatyn qyzmet jetildirildi, dep habarlaidy QazAqparat.
Eńbek jáne halyqty áleýmettik qorǵaý ministrligine qarasty Eńbek resýrstaryn damytý ortalyǵynyń sarapshylary sáýir aiynyń basynda Enbek.kz elektrondyq eńbek birjasynda jańa quraldarmen daǵdylar bankin tolyqtyrdy. Endi túiindeme toltyrý kezinde paidalanýshylar óz bilimi men iskerligin dálirek sipattai alady. Bul rette qajetti parametrlerdi tańdaý ońtailandyrylyp otyr. Atap aitqanda júie jumys izdeýshilerdiń kásipteri men mamandyqtaryna sáikes keletin daǵdylardy, ikemdilik pen biliktilikterdi ózi kórsetedi.
«Buryn Enbek.kz saity arqyly jumysqa ornalasý kezinde jumys berýshi men qyzmetker arasynda jumys tájiribesi, jalaqy mólsheri jáne atqaratyn laýazymyna sáikestigi jóninde kelispeýshilikter jii týyndaityn. Azamattardyń kóbi saittaǵy daǵdylar banki qyzmetkerlerge qoiylatyn naqty talaptardy kórsetýge múmkindik bermeitinine shaǵymdanatyn. Endi biz júieni zamanǵa sai talapqa beiimdedik. Jumys berýshilermen ártúrli mamandyqtar úshin kásibi standarttardy ázirledik. Qazir biz olardy jańartylǵan daǵdylar bankine engizemiz. Ol kóp uzamai paidalanýshylardyń talaptaryna tolyǵymen sáikes keletin bolady», - dedi ERDO mamandyqtar atlasyn súiemeldeý basqarmasynyń basshysy Olga Kiseleva.
Jańashyldyqtar qazaqstandyq jumys berýshiler qaýymdastyǵy daiyndaǵan 480 kásibi standarttyń negizinde engizildi. Enbek.kz saitynda atalmysh júie birinshi kezekte jumys berýshilerge barynsha qolaily mamandardyń túiindemesin, al izdenýshilerge qolaily mekemelerdi kórsetedi. Tańdaý kezinde basymdyq túiindemede jáne qajetti mamanǵa qoiylatyn talaptar tizimin toltyrý kezinde jazǵan kilt sózderdiń (ár mamannyń qandai jeke daǵdylary bar) sáikes kelýine negizdelmek. Osylaisha jumys izdeýshiler men jumys berýshiler qajetti nátijege jyldam qol jetkizedi.
Jańartylǵan daǵdylar banki jaqynda testtik rejimde iske qosylady. Birneshe ai ishinde avtomatty toltyrý negizinde usynylatyn suraqtar túrinde eń qajetti daǵdylar anyqtalmaq. Bul túiindemeni toltyrýdy jáne izdenýshilerge qoiylatyn talaptardy jeńildetedi. Sondai-aq, joba avtorlary paidalanýshylardyń keri pikirin ala alady.
Eske sala ketsek Qazaqstandaǵy jumys izdeýshiler men bos jumys oryndary týraly enbek.kz portalyna osydan úsh jyl buryn ashylǵan edi. Enbek.kz portaly arqyly bos oryndar týraly aqparatty jetkizý úshin jumyspen qamtý zańnamasyna ózgerister engizý qarastyrylǵan. Ol qaǵazbastylyqty joiyp, biznes jumysyn jeńildetýge múmkindik beredi.
