70 myń otbasynyń ataýly áleýmettik kómek boiynsha bergen ótinishi qaralyp jatyr. Bul týraly Premer-Ministrdiń orynbasary Berdibek Saparbaev aitty, dep habarlaidy "Ult aqparat".
«Eńbekke jaramdy adam shamasy kelip tursa jumys isteýi kerek. Barlyq memlekettik qoldaý men kómek, áleýmettik sharalar shynynda da, muqtaj adamǵa kórsetilýi tiis. Alaida, ókinishke qarai, buǵan deiin aitqanymyzdai, AÁK taǵaiyndaý kezinde keibir azamattardyń óz tabysyn jasyrý faktilerin kóp kezdestirdik. Máselen, tabysy 200 myń nemese 300 myń teńge adamdar óz ailyǵyn 40 myń teńge dep kórsetken», - dedi Berdibek Saparbaev Úkimettiń baspasóz ortalyǵynda.
Vitse-premer Eńbek jáne halyqty áleýmettik qorǵaý ministrliginiń qyzmetkerleri turaqty monitoring jumystaryn júrgizip otyrǵanyn, eńbek resýrstary boiynsha ortalyqqa jumys isteitin barlyq qazaqstandyq týraly málimet túsip jatqanyn aityp berdi.
«Osynyń negizinde kez kelgen azamattyń ailyǵyn aiqyndap, bilip otyrmyz. Otbasy múshelerine shaqqandaǵy tabystaryn anyqtaimyz. Otbasyndaǵy jan basyna shaqqanda kúnkóris minimýmynan 70 paiyzǵa asa ma – solarǵa AEK beriledi. Biraq, ókinishke orai, qazirgi tańda mundai otbasylardyń sany Qazaqstan boiynsha 70 myńnan asady (...) Osy 70 myń otbasynyń shynaiy tabysyn pysyqtaý baǵytynda jergilikti bilik organdarymen jumys júrgizip jatyrmyz. Elbasy da, Memleket basshysy aitqandai «kómek naǵyz muqtaj adamdarǵa berilýi kerek»,- dedi Berdibek Saparbaev.
Sondai-aq, ol muqtajdyq pen masyldyqty ajyrata bilý qajettigi týraly aitty.
«Eger biz osyny paidalanyp, jumys istemei masyl bolyp ketsek, bárimiz masyl bolyp ketsek, bolashaǵymyz qalai bolady. Jastardy qalai tárbieleimiz. Sondyqtan, bul jerde masyldyq bolmaýy kerek», - dep atap ótti vitse-premer.
