QR Eńbek jáne halyqty áleýmettik qorǵaý ministri Birjan Nurymbetov Úkimet otyrysynda múgedektigi bar adamdardy jumyspen qamtý kórsetkishterin baiandady, dep habarlaidy QazAqparat.
«Búginde Qazaqstanda 705 myńnan astam múgedektigi bar adam turady. Onyń ishinde 430 myńy – eńbekke qabiletti jastar, 181 myńy – zeinet jasynda jáne 94 myńy – balalar. Biyl áleýmettik tólemderge, ońaltýdyń tehnikalyq quraldary men qyzmettermen qamtamasyz etýge 448 mlrd teńge baǵyttaldy. Bul ótken jylmen salystyrǵanda 12 paiyzǵa artyq», - dedi ministr Úkimettiń búgingi otyrysynda.
Onyń aitýynsha, eńbekke qabiletti jastaǵy múgedek jandardyń jalpy sanynan 100 myń adam nemese 23 paiyzy jumysqa tartylǵan. 2025 jylǵa qarai bul kórsetkishti 30 protsentke deiin ulǵaitýdy josparlanǵan.
«Eńbek» baǵdarlamasy aiasynda biyl 13 myń múgedek jan jumysqa ornalasty, 626 adam kásipkerlik negizderine oqytyldy, 830 óteýsiz grant jáne 350 shaǵyn nesie berildi. Qazirgi ýaqytta múgedek adamdarǵa arnalǵan kásipter atlasy daiyndalýda, múgedek adamdardy suranysqa ie mamandyqtarǵa, onyń ishinde IT daǵdyrlary boiynsha oqytý júrgizilýde. «Damý» qorymen birlesip, múgedek adamdardyń qatysýymen iske asyrylatyn 76 biznes jobany qoldaý sharalary bastaldy», - deidi B. Nurymbetov.
Memlekettik organdarmen birlesip, múgedek adamdardy memlekettik qyzmetshiler qataryna tartý boiynsha da jumystar júrýde. Biylǵy 1 qarashada olardyń sany 701 adamǵa jetti, onyń ishinde 391 adam Memlekettik basqarý akademiiasynyń onlain kýrstarynan ótken.
«Óńirlerde kásiporyndar men múgedek adamdardy jumysqa ornalastyrý boiynsha belgilengen kvotalardy oryndaý boiynsha jumys júrgizý ózekti bolyp qalýda. Búgingi tańda kásiporyndardyń 36 paiyzy zańnama talaptarynyń oryndalýyn qamtamasyz etken. Ákimderge osy máselege erekshe kóńil bólýdi suraimyz», - dedi Birjan Nurymbetov.
