Eńbek jáne halyqty áleýmettik qorǵaý ministri Tamara Dúisenova jumys ústinde qansha qazaqstandyqtyń ómiri qiylǵany týraly aityp berdi, dep habarlaidy QazAqparat.
«Eger jyl saiynǵy statistikaǵa súiensek, 1 500-den astam jumysshy óndiriste jaraqat alady, 250-ge jýyq adamnyń ómiri qiylady. Sonymen birge osyndai jaraqattardyń 16 paiyzy - qurylys salasyna, 15 paiyzy taý-ken metallýrgiia salasyna tiesili», - dep atap ótti ministr Úkimet otyrysynda.
Aita keteiik, Úkimet otyrysynda QR Investitsiialar jáne damý ministri Jeńis Qasymbek búginde ministrliktiń qadaǵalaýynda 230 myńnan asa qaýipti óndiristik nysandy qamtityn 9 myńnan asa kásiporyn bar ekenin atap ótti. Osy oraida jerasty kenishteri men kómir shahtalary, karerler men razrezder, munai jáne gaz óndirý ken oryndary, metallýrgiia, sondai-aq himiia, munai óńdeý zaýyttary, atom ónerkásibi, magistraldyq qubyrlar qamtylǵan.
Vedomstvo basshysynyń aitýynsha, sońǵy jyldarda qaýipti óndiristik nysandardyń apatsyz jumysy boiynsha oń qarqyn baiqalýda.
«Osylaisha, 2016 jylǵy apattardyń sany 2008 jylmen salystyrǵanda 60 paiyzǵa (58-den 23 apatqa) azaidy. Apat nátijesinde zardap shekkender sany 4 esege (102 adamnan 28 adamǵa) tómendegen», - dedi Jeńis Qasymbek.
Aǵymdaǵy jyldyń 10 aiy ishinde respýblikanyń qaýipti óndiristik nysandarynda 11 apat oryn aldy, al 2016 jyldyń dál osy kezeńinde 14 apat bolǵan (21 paiyzǵa tómendedi). Saldarynan 12 adam zardap shegip, 4 adam qaza tapty.
