QR Eńbek jáne halyqty áleýmettik qorǵaý ministrligi 2019 jylda nátijeli jumyspen qamtýdy jáne jappai kásipkerlikti damytýdyń «Eńbek» memlekettik baǵdarlamasyn júzege asyrýdyń qorytyndysyn jariialady, dep habarlaidy QazAqparat.
Osy oraida Ortalyq kommýnikatsiialar qyzmetinde QR Eńbek jáne halyqty áleýmettik qorǵaý birinshi vitse-ministri Erjan Jylqybaev iske asyrylǵan jumystardy baiandady.
Onyń sózine qaraǵanda, 2019 jyldyń qorytyndysy boiynsha elimizde 424 myń jańa jumys orny qurylǵan, bul jyldyq jospardan 14 paiyzǵa joǵary. Onyń ishinde turaqty jumys oryndarynyń sany 280 myńdy nemese 66 paiyzdy qurady. Ekonomikalyq qyzmet túrleri bólinisinde jumys oryndarynyń eń kóp sany mynadai salalarda quryldy: kóterme jáne bólshek saýda – 44 myń, qurylys – 43 myń, aýyl, orman jáne balyq sharýashylyǵy – 39 myń.
Birinshi vitse-ministr 2019 jyly «Eńbek» memlekettik baǵdarlamasyn júzege asyrý qorytyndysy týraly aita kele, halyqty jumyspen qamtýǵa járdemdesýdiń belsendi sharalary jumyssyzdyqtyń ósýine jol bermeýge yqpal etkenin aitty. Onyń deńgeii 2018 jylǵy 4,9 paiyzdan 4,8 paiyzǵa deiin tómendep, sonyń ishinde jastar arasyndaǵy jumyssyzdyq deńgeii 3,8 paiyzǵa qysqardy.
«2019 jyly memlekettik baǵdarlamany qarjylandyrýǵa 178 mlrd teńge bólindi. Jumyspen qamtýǵa járdemdesý sharalarymen 660 myń adam qamtyldy, onyń 261 myńy nemese 40 paiyzy – jumyssyzdar, 36 paiyzy – jastar, 2 paiyzy – tabysy az kópbalaly otbasylar. 2019 jyly memlekettik baǵdarlama aiasynda 449 myń adam jumysqa ornalastyryldy, onyń 383 myńy nemese 85%-y turaqty jumyspen qamtyldy», – dedi ol.
Jylqybaev memlekettik baǵdarlamanyń birinshi baǵyty jastarǵa tehnikalyq jáne kásiptik bilim berýdi, jumyssyz azamattardyń kásiptik daǵdylary men biliktilikterin qysqa merzimdi kýrstar arqyly jetildirýdi qarastyratynyn eske saldy.
«2019 jyly 22 myń jas litseiler men kolledjderge tehnikalyq jáne kásiptik bilim alýǵa qabyldandy. Memlekettik baǵdarlamaǵa qatysýshylarǵa shákirtaqy, bir rettik ystyq tamaq jáne jol júrýge qarjylai kómek kórsetiledi. 57 myń adam (25 myń jumyssyzdar, 17 myń ózin-ózi jumyspen qamtyǵandar) qysqa merzimdi kýrstarǵa jiberildi, olardyń ishinde 50 myń adam oqýdy aiaqtady. Oqýdy bitirgenderdiń 75%-y turaqty jumysqa ornalastyrylǵanyn atap ótken jón», – dedi birinshi vitse-ministr.
