Jyl basynan beri qazaqstandyqtarǵa 1,3 trln-nan astam teńge zeinetaqy tólengen, dep habarlaidy "Ult aqparat".
2021 jyldyń qańtar - maýsym ailarynda respýblikalyq biýdjetten bazalyq zeinetaqy tóleýge - 410,8 mlrd teńge, yntymaqty zeinetaqy tólemine – 928,9 mlrd teńge baǵyttaldy.
2021 jylǵy 1 shildedegi jaǵdai boiynsha zeinetkerler sany 2 mln 239 myń adamdy quraidy.
2021 jylǵy maýsymda respýblikalyq biýdjetten zeinetaqyǵa 222,3 mlrd teńgeden astam, onyń ishinde bazalyq zeinetaqyny tóleýge – 68,2 mlrd teńge, yntymaqty zeinetaqyny tóleýge – 154,1 mlrd teńge baǵyttaldy.
Zeinetaqy tóleminiń ortasha mólsheri (onyń ishinde bazalyq zeinetaqy) 2021 jylǵy 1 shildedegi jaǵdai boiynsha 99 898 teńgeni qurady.
Eske salaiyq, 2018 jylǵy 1 shildeden bastap memlekettik bazalyq zeinetaqy tólemi, onyń zeinetaqy júiesindegi tájiribesin eskere otyryp, ár alýshyǵa jeke taǵaiyndalady.
Bul rette 1998 jylǵy 1 qańtardaǵy jaǵdai boiynsha yntymaqty júiede jumys istegen ýaqyty, sondai-aq mindetti zeinetaqy jarnalary tólengen kezeńder zeinetaqy júiesindegi eńbek ótiline qosylady.
Sonymen, eger zeinetaqy júiesindegi jumys ótili 10 jyl nemese odan az bolsa, sondai-aq eger múlde joq bolsa, bazalyq zeinetaqy - eń tómengi kúnkóris deńgeiiniń 54%-y.
Odan keiin 10 jyldan asqan ár jyl úshin onyń mólsheri 2%-ǵa artady.
Mysaly, eger siz 20 jyl qatyssańyz, bazalyq zeinetaqy kúnkóris deńgeii qunynyń 74%-yn, 30 jyl – kúnkóris qunynyń 94%-yn quraidy.
33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi.
Eger bir ai ishinde MZJ birneshe ret Biryńǵai jinaqtaýshy zeinetaqy qoryna jasalsa, jinaqtaýshy júiege qatysý merzimi bir aidy quraidy.
Osylaisha, mindetti zeinetaqy jarnalary neǵurlym turaqty jáne tolyq salynatyn bolsa, zeinetaqy jasyna jetkende bazalyq zeinetaqy tólemderiniń mólsheri soǵurlym kóp bolady.
Óz kezeginde jasyna bailanysty zeinetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 ai qajet) jáne zeinetkerlikke deiingi kezeńde alynǵan ortasha ailyq tabysqa bailanysty bolady.
