QR Eńbek jáne halyqty áleýmettik qorǵaý ministrligi qazaqstandyqtardyń mamyr aiynda alǵan zeinetaqysy maýsymdaǵydan nelikten kóp bolǵanyn túsindirdi, dep habarlaidy "Ult aqparat" ministrliktiń baspasóz qyzmetine silteme jasap.
«Munyń sebebi – tólemderdi qosymsha 5%-ǵa indekstegennen keiin sáýirde tolyq alynbaǵan qosymsha tólemder. Memleket basshysynyń 2020 jylǵy 30 naýryzdaǵy tapsyrmasy boiynsha zeinetaqy tólemderi men járdemaqylardy jyldyq mánde 10%-ǵa qosymsha indeksteý júrgizildi. Osylaisha, 2020 jylǵy 1 qańtardan bastap júzege asyrylǵan bazalyq zeinetaqy men memlekettik járdemaqylar 5%-ǵa, al jasyna bailanysty zeinetaqy 7%-ǵa artqan kezde, 1 sáýirden bastap barlyq tólemder qosymsha taǵy 5%-ǵa ósti», delingen habarlamada.
Sáýirdegi ósim qosymsha qujattardy talap etpesten avtomattandyrylǵan rejimde júzege asyryldy. Al mamyrda azamattar ósimdi eskere otyryp tólemder aldy.
«Azamattardyń sáýir aiynda almaǵan zeinetaqynyń jańa jáne eski mólsheri arasyndaǵy aiyrmashylyq mamyr aiynda kezekti zeinetaqy tólemimen birge tólendi. Mysaly, eger 2020 jylǵy qańtardan bastap zeinetaqy tólemderiniń mólsheri (jasyna bailanysty zeinetaqy + bazalyq zeinetaqy) 90 400 teńgeni qurasa, aǵymdaǵy jylǵy 1 sáýirden bastap zeinetaqy tólemderiniń jańa mólsheri 94 920 teńgeni (90 400 teńge + 5% arttyrý) quraidy. Bul rette tólem mamyr aiynda 99 440 teńgeni (94 920 teńge + sáýir aiyna qosymsha 4520 teńge) qurady. Maýsym aiynda zeinetaqy tiisinshe 94 920 teńgeni qurady», delingen habarlamada.
Esterińizge sala keteiik, 2020 jylǵy 1 sáýirden bastap eń tómengi zeinetaqy tólemi 58 082 teńge, onyń ishinde bazalyq zeinetaqy tóleminiń eń tómengi mólsheri – 17 641 teńge bolyp belgilengen.
