Biyl 1 shildede «Eńbek» memlekettik baǵdarlamasy ulttyq jobaǵa aýystyrylady. Bul týraly QR Eńbek jáne halyqty áleýmettik qorǵaý ministri Serik Shápkenov aityp berdi, dep habarlaidy QazAqparat.
«Memleket basshysynyń tapsyrmasymen, biyl 1 shildeden bastap, «Eńbek» memlekettik baǵdarlamasy ulttyq jobaǵa aýystyrylady. Bul oraida quraldar men mindetter jańa ádisnamaǵa sáikes ózektendirilip qana qoimai, oǵan múldem jańa tetikter men biznes-protsester engiziledi. Atap aitsaq, birinshi mindet boiynsha, jumysta otyryp oqyp, praktikalyq daǵdylardy damytýǵa múmkindik jasalady. Elektrondy eńbek birjasy bazasynda naryqta suranysqa ie mamandyqtar boiynsha onlain oqytýdyń jalpyulttyq platformasy iske qosylady», - dedi ministr Úkimettiń búgingi otyrysynda.
Ekinshi baǵyt aiasynda kásipkerlik bastamalardy qoldaý barynsha avtomattandyrylady. Aýyldyq jerlerde kásipkerlikpen ainalysýdy keńeitý úshin óndirýshiler men satyp alýshylardy bailanystyrý sharalary qabyldanady.
Kelesi jyly kreditteý jáne granttyq qoldaý úshin biznes-jobalardy irikteý óńirlerdiń qajettiligine qarai júzege asyrylady, sondai-aq kásipkerler palatasynyń mamandarymen oqýdan bastap, kásipker bolǵansha súiemeldenetin bolady.
«Úshinshi mindet nysanaly toptardy ataýly túrde qoldaýǵa negizdeledi. Bul oraida olardyń qajettilikterine qarai jumyspen qamtýǵa járdemdesý boiynsha jekelegen jobalardy iske asyramyz. Jumyspen qamtý salasyndaǵy qyzmetterdi elektrondy formatqa aýystyrý boiynsha keshendi sharalar qabyldaimyz. Bul baǵytta eń aldymen eńbek naryǵynyń infraqurylymy damytylyp, mobildi jáne tsifrly jumyspen qamtý ortalyqtary ashylady. Sondai-aq, jumyspen qamtý qyzmetteri onlain jáne proaktivti túrde, iaǵni ótinish berýsiz keńinen usynylady», - dep túsindirdi Eńbek ministri.
Spikerdiń aitýynsha, ulttyq joba aiasynda qabyldanyp jatqan sharalar bolashaqta halyqtyń ómir súrý sapasyn jaqsartýǵa jáne naqty aqshalai tabystyń 27 paiyzǵa, eńbekaqynyń 304 myń teńgege deiin ósýine, jańa jumys oryndaryn qurýǵa jáne 2025 jylǵa qarai jumyssyzdyq deńgeiin 4,7 paiyzǵa deiin tómendetýge yqpal etedi.
