«Eńbek» memlekettik baǵdarlamasynyń arqasynda 2017 jyldan beri 1 millionǵa jýyq adam jumysqa ornalasty. Bul týraly QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat tilshisi.
«Búgingi koronavirýs indeti jáne onyń saldarynan ekonomikada oryn alyp otyrǵan jaǵdaida halyqtyń tabysyn qamtamasyz etý úshin jumyspen qamtý jáne jańa jumys oryndaryn qurý máselesi asa mańyzdy. «Eńbek» memlekettik baǵdarlamasy jańa jumys oryndardy ashýdy qoldai otyryp, jumysssyz jáne óz betinshe jumyspen qamtylǵan azamattardyń eńbekpen qamtylýyna jaǵdai jasaidy. Baǵdarlamaǵa 2017 jyldan bastap 2 mln-nan astam adam qatysqan. Onyń ishinde biyl 430 myń adam qatysyp otyr. 956 myń adamǵa birden bos oryndarǵa jumysqa turýǵa kómek kórsetsek, 1 mln-nan astam adamǵa jumyspen qamtýdyń belsendi sharalary usynylǵan. 395 myń adam ártúrli oqýmen qamtylyp, 111 myń adam jeńildetilgen shaǵyn nesie men granttar arqyly kásipkerlikti damytýǵa qoldaý aldy. Olar óz kezeginde 42 myń jańa jumys ornyn ashty. 600 myńǵa jýyq adam sýbsidiialanatyn jumys oryndary arqyly jumyspen qamtyldy. Belsendi sharalar kórsetilgennen keiin 269 myń adam turaqty jumysqa ornalasqanyn da atap ótken jón», - dedi ministr Májilistegi Úkimet saǵatynda.
Onyń aitýynsha, 2017 jyldan bastap baǵdarlama baǵyttaryn teńgerimdi qarjylandyrý jolymen 4 jylǵa 540 mlrd teńge bólingen. Onyń ishinde 160 mlrd teńgesi - jergilikti biýdjetterdiń úlesine tiesili. Baǵdarlamanyń qarjylandyrylýynda da turaqty jumys oryndaryn quratyn kásipkerlik sektoryna basym nazar aýdarylǵan.
Biyl daǵdarysqa qatysty qosymsha bólingen 50 mlrd teńge esebinen jastar tájiribesi, qoǵamdyq jumys jáne grantqa arnalǵan shyǵyndar ulǵaiǵan.
«Baǵdarlamada ony iske asyrý jáne qarjylandyrý jaǵynan jaýapkershilik naqty bólingenin atap ótkim keledi. Biýdjettik ákimshi retinde qarajattyń 52 paiyzyna bizdiń ministrlik jaýapty. Kredit berý jaǵynan jaýapkershiliktiń 25 paiyzy - Aýyl sharýashylyǵy ministrligine, 5 paiyzy - Ulttyq ekonomika ministrligine júkteledi. 13 paiyzy - Bilim jáne ǵylym ministrligine jáne 5 paiyzy - Indýstriia jáne infraqurylymdyq damý ministrligine tiesili», - dedi Birjan Nurymbetov.
