QR Eńbek jáne halyqty áleýmettik qorǵaý ministri Serik Shápkenov «Eńbek» memlekettik baǵdarlamasynyń nátijelerin aityp berdi, dep habarlaidy QazAqparat.
«Eńbek» memlekettik baǵdarlamasy boiynsha biylǵy 9 aida 377 myń adam jumyspen qamtyldy jáne onyń 70 paiyzy – turaqty jumysqa ornalasty. Sonymen qatar barlyǵy 65 myń adam oqýmen qamtamasyz etildi. Baǵdarlamanyń ekinshi baǵyty boiynsha 29 myń adam mikrokreditter men kaitarymsyz grantqa ie bolyp, onyń 25 myńnan astamy alǵash ret óz isin ashty jáne qosymsha 8 myńǵa jýyq jańa jumys oryndaryn qurdy», - dedi Eńbek ministri Úkimet otyrysynda.
Onyń aitýynsha, 5 500 adam soltústik óńirlerge qonys aýdardy. Jumysqa qabiletti jastaǵy qonys aýdarýshylardyń 78 paiyzy jumyspen qamtyldy. Bul baǵdarlamaǵa qatysýshylardyń 39 paiyzy – jastar, 50 paiyzy – áielder jáne 53 paiyzy – aýyl turǵyndary.
«Nur Otan» partiiasynyń sailaýaldy baǵdarlamasynda qarastyrylǵan «Eńbek» baǵdarlamasy 83 paiyzǵa oryndaldy. Aqmola, Qostanai, Pavlodar, Jambyl oblystarynda jáne Nur-Sultan qalasynda barlyq kórsetkishter tolyǵymen oryndaldy. Qalǵan óńirlerdegi ákimdikterdi osy baǵyttaǵy jumystardy kúsheitýi qajet», - dedi Shápkenov.
