«Eńbek» memlekettik baǵdarlamasyna ózgerister engizý kerek. Bul týraly Senattyń jalpy otyrysynda depýtat Erik Sultanov málim etti, dep habarlaidy "Ult aqparat".
«Soltústik Qazaqstan oblysy – 635 aýyldyq eldi mekende turatyn aýyl halqynyń úlesi 54 paiyzdy quraityn aimaq. Aýyldyq eldi mekenderdiń jalpy sanyndaǵy 97 aýyldyń halqy 50 adamnan kem, olar «Qazaqstan Respýblikasynyń ákimshilik-aýmaqtyq qurylysy týraly» Zańǵa sáikes, taratylýǵa jatady jáne derbes ákimshilik-aýmaqtyq birlik mártebesinen aiyrylady. Sońǵy úsh jyldyń ishinde 33 eldi mekende taratý sharalary júrgizildi. Qazirgi ýaqytta zańnama tek aýmaqtyq birlikterdiń eń jaqyn aýylyn taratý jáne oǵan qosylý shemasyn retteidi. Bul rette joǵary ári orta damý áleýeti bar aýyldarda kóship kelýshilerdiń baspana satyp alýy úshin biýdjetten qarajat bólý qarastyrylmaǵan», - dep toqtaldy senator QR Úkimet basshysy Asqar Maminniń atyna joldaǵan depýtattyq saýalynda.
Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynda respýblikalyq biýdjetten beriletin transfertter arqyly óńiraralyq qonys aýdarýdy memlekettik qoldaý sharalary, onyń ishinde turǵyn úimen qamtamasyz etý sharalary qarastyrylǵan.
«Aýyldyq jerlerdi tiimdi damytý jáne ekonomikalyq turǵydan keleshegi bar aýyldarda resýrstardy shoǵyrlandyrýǵa múmkindik beretin ońtaily aýyldyq eldi mekender shemalaryn qalyptastyrý úshin qoldanystaǵy «Eńbek» memlekettik baǵdarlamasyna ózgerister men tolyqtyrýlar engizý máselesin qarastyrýdy suraimyz. Atap aitqanda, taratylǵan aýyldardyń turǵyndary úshin jyl saiyn turǵyn úi salýǵa nemese satyp alýǵa qarajat bóle otyryp, olarǵa memlekettik qoldaý kórsetýdi qamtamasyz etý. Bul máseleni qoldaý keleshegi joq aýyldardyń kúrdeli máselelerin sheshedi jáne qonystanǵan azamattardyń osy sharalarǵa degen qajettilikti qabyldaýyna oń áser etedi», - dedi E. Sultanov.
