«Eńbek» memlekettik baǵdarlamasymen 328,5 myń adam jumysqa ornalastyryldy, dep habarlaidy Eńbek jáne halyqty áleýmettik qorǵaý ministrliginiń baspasóz qyzmeti.
Vedomstvonyń málimdeýinshe, 1 qyrkúiektegi jaǵdai boiynsha Nátijeli jumyspen qamtýdy jáne jappai kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasyna 451,6 myń adam qatysqan. 328,5 myń adam jumysqa ornalastyrylyp, onyń 200,7 myńy turaqty jumysqa turdy.
«Baǵdarlamanyń birinshi baǵyty aiasynda qysqa merzimdi kýrstarǵa 15,2 myń adam jiberildi. 5,5 myńnan astam adam óz isin ashý úshin jeńildikti mikrokredit, al 20,2 myńy qaitarymsyz memlekettik grant aldy.
Sýbsidiialanatyn jumys oryndaryna 155,7 myń adam jumysqa ornalastyryldy, onyń ishinde: áleýmettik jumys oryndaryna 16,6 myń adam; jastar praktikasyna – 21,4 myń adam; qoǵamdyq jumystarǵa – 117,4 myń adam bardy», delingen habarlamada.
Ministrliktiń málimetinshe, eńbek resýrstarynyń utqyrlyǵy sheńberinde 1 342 otbasy nemese 4 571 adam qonys aýdarǵan, onyń ishinde 1 952 adam eńbekke qabiletti jasta.
«Onyń ishinde 1 329 adam jańa turǵylyqty jerinde turaqty jumysqa ornalastyryldy jáne 111 adam kásipkerlik qyzmetpen ainalysady, 5 adam oqýǵa jiberildi», dep habarlady vedomstvodan.
Eske sala ketsek, 2020 jyly «Eńbek» memlekettik baǵdarlamasyna 649 myń adam qatysty. 437,3 myń adam jumysqa ornalastyryldy, onyń 319,2 myńy turaqty jumysqa turdy. Jappai kásipkerlikti damytýǵa 12,7 myń mikrokredit jáne jańa biznes ideiany iske asyrýǵa 44,9 myń qaitarymsyz memlekettik grant berildi.
Budan basqa, eńbek resýrstarynyń utqyrlyǵyn arttyrý sheńberinde jumys kúshi artyq óńirlerden quramynda 5,8 myń adam bar 1,8 myń otbasy qonys aýdardy.
