Foto: aikyn.kz
Memleket basshysy Qasym-Jomart Toqaev atap ótken «Adal azamat» tujyrymdamasynyń bir taraýy sol eńbek adamynan bastalady. Adal azamat degenimizdiń ózi – jaqsy qasietterge ie bolyp, adal eńbek etetin jáne tabysqa adal jolmen jetetin adam. Iaǵni, adaldyq pen ádildikti bárinen biik qoiatyn jan.
«Ozyq oily ult bolý úshin búkil qoǵam sana-sezimin ózgertip, jańa qundylyqtardy ornyqtyrýy kerek. Árbir adam «Adal azamat» degen atqa laiyq bolsa, elimizde ádil qoǵam ornaidy. «Adal adam – Adal eńbek – Adal tabys» – bir-birinen ajyramaityn uǵymdar. Osy úsh taǵandy ozyq ári tabysty elge ainalýdyń basty kilti deýge bolady», – dep atap ótti Memleket basshysy óz sózinde.
Qyrkúĭek aĭynyń sońǵy jeksenbisinde atalyp ótetin Eńbek kúni qarsańynda biz de elimizge sińirgen eńbegimen, adal qasietterimen tanylyp júrgen naǵyz mańdai ter, adal eńbektiń nanyn jep júrgen jandar jóninde, qarapaiym eńbek adamy jaily aitsaq degen edik. Paiyzhan Esaliev Túrkistan oblysy Arys qalasyndaǵy Arys lokomotiv paidalaný deposynda vagon qabyldaýshy bolyp jumys isteidi. Alǵashqy eńbek jolyn osynda bastap, taban tiremei shirek ǵasyrdan asa eńbek etip kele jatqan naǵyz qara kúshtiń iesi.
Quramynda lokomotivterge tehnikalyq qyzmet kórsetý pýnkti, qummen jabdyqtaý qoimasy bar Arys lokomotiv paidalaný deposynyń ǵasyrdan astam tarihy bar. Arys-Taraz-Arys jáne Arys-Saryaǵash-Arys baǵytynda júk tasymaldaý qyzmetterin atqaratyn qyzmet kórsetý aýqymy keń depoda Paiyzhan Qojanulynyń ózimen birge ákesiniń de talai jylǵy eńbek izi jatyr. «Ortalyq Aziia qaqpasy» atanǵan Arys qalasynda temirjolshy otbasynda týǵan onyń ákesi osy depoda jumys istepti. Qurmetti temirjolshy atanyp, ainalasyna súikimdi bolǵan jannyń uly da ákesine eliktep ósken. Óskende men de temirjolshy bolamyn degen qiialy ony aqyry osy salaǵa jetektep kelipti. Alǵashqy eńbek jolyn sonaý 1986 jyly slesorlyqtan bastap, vagon jóndeý boiynsha brigadir, dońǵalaq tsehtyń sheberi baspaldaqtarynan ótip, qazir Arys lokomotiv paidaldaný deposynyń vagon qabyldaýshysy qyzmetin atqaryp júr. Tańǵy 9-da bastalatyn jumys keshki 9-ǵa deiin jalǵasady. 12 saǵat jumys kestesimen vagondardyń jóndeý jumystaryn qadaǵalaidy. 5 bólshekten turatyn vagondarǵa ár 3 jyl saiyn kúrdeli jóndeý jumystary júredi. Al Paiyzhan Qojanuly osynaý vagondardyń sapaly qyzmet etýi úshin kelgen vagondardy qabyldap, ony ary qarai joldaýdy jaýapkershilikke alǵan.
Arys qalasynyń toǵyz joldyń toraby atanýy da tekten-tek emes. Munda jolaýshylar tórt tarapqa ketedi. Ortalyq Aziia men Qazaqstandy biriktirip turǵan iri stansa bar, toǵyz joldyń toraby atalýy da sol sebepten. Sondyqtan bolsa kerek, halqynyń basym kópshiligi shoiyn jol salasynda qyzmet etedi.
Búginde 5 ul-qyz tárbielep, árqaisysynyń óz jolyn taýyp ketýine sebepker bolyp otyrǵan otaǵasynyń ujymynda da abyroiy asqaq. Adal eńbek, mańdai terin baǵalaǵan ujymdastary ony birneshe marapatqa usynǵan. Arys lokomotiv paidalaný deposynyń poiyzdar qozǵalysynyń qaýipsizdigin saqtaýdy arttyrýǵa qosqan úlesteri úshin Prezidenttiń alǵyshatymen, ministrliktiń jáne oblystyq, aýdandyq deńgeidegi bilik ókilderinen marapattar alǵan. «Ujymda aýyzbirshilik mol, meniki, seniki demei kez kelgen jumysty bir kisidei atqaryp, bir-birine qoldaý kórsetip turady. Osyndai ujymmen jumys istegenime qýanyshtymyn. Jumysym ózime unaidy», – deidi Paiyzhan Qojanuly bizben áńgimesinde.
Memleket basshysy «Biz quryp jatqan jańa qoǵamda eńbek adamy eń birinshi orynda turýy kerek» degen ustanymyn qoldaý maqsatynda biz de jumysshylardyń tynys-tirshiligine úńildik. Qarapaiym azamattar kúndelikti ómirde kórsetip jatqan iskerlik, eńbekqorlyq qasietter shyn máninde bizdiń otanshyldyq rýhymyzdy kóteredi degen senimdemiz.
Nazgúl NAZARBEK,
Túrkistan oblysy
