Qazaqstanda azyq-túlik tutyný mólsheriniń táýliktik qýattylyǵyn 2 175 kkal-dan 2 330 kkal-ǵa deiin kóterý máselesin qarastyrý josparlanyp otyr. Bul týraly Májilis depýtattarynyń saýalyna QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
«Eń tómen áleýmettik standarttar jáne olardyń kepildikteri týraly» Qazaqstan Respýblikasy Zańynyń 16-babyna sáikes eń tómengi kúnkóris deńgeii (ETKD) áleýmettik qamsyzdandyrý salasyndaǵy eń tómen áleýmettik standarttardyń biri bolyp tabylady. Halyqaralyq jáne ulttyq sarapshylardy tartý arqyly júrgizilgen zertteý nátijesinde ETKD esepteý ádistemesin jetildirý boiynsha sharalardy eki kezeńmen júzege asyrý qarastyryldy.
Birinshiden, 2018 jylǵy 1 qańtardan bastap ETKD-niń qurylymy qaita qaralyp, azyq-túlik emes taýarlarynyń úlesi 40 paiyzdan 45 paiyzǵa deiin ósti. Nátijesinde ETKD mólsheri 2017 jylmen salystyrǵanda (24 459 teńgeden 28 284 teńgege deiin) ulǵaidy jáne 3 mln astam azamattyń kirisine oń áser etti. Bul maqsatqa respýblikalyq biýdjetten qosymsha 386 mldr teńge bólindi», - dedi Asqar Mamin.
Úkimet basshysynyń atap ótýinshe, 2020 jyly eldegi epidemiologiialyq jaǵdaiǵa bailanysty ETKD mólsheri 10 paiyzǵa nemese 29 698 teńgeden 32 668 teńgege deiin kóterildi. Sáikesinshe, ETKD mólsherimen eseptelgen áleýmettik tólemderdiń mólsheri ulǵaityldy. Osy maqsatqa qosymsha 140 mlrd teńge jumsaldy.
«Ekinshiden, sońǵy jyldary halyqtyń azyq-túlik ónimderin tutynýynda bolǵan ózgerister, eldiń azyq-túlik naryǵynyń erekshelikteri jáne Qazaq tamaqtaný akademiiasynyń usynystary eskerile otyryp, azyq-túlik taýarlarynyń tizimin 43-ten 51 ataýǵa deiin arttyrý, azyq-túlik tutyný mólsheriniń táýliktik qýattylyǵyn 2 175 kkal-dan 2 330 kkal-ǵa deiin kóterý máselesin qarastyrý josparlanyp otyr. ETKD-niń mólsherin memlekettiń bazalyq áleýmettik tólemderin esepteýdiń negizi retinde, tutyný sebetiniń naqty qunyn kórsete otyryp, turaqty negizde qaita qaraý Qazaqstan Respýblikasy Prezidentiniń 2018 jylǵy 15 aqpandaǵy № 636 Jarlyǵymen bekitilgen Qazaqstan Respýblikasynyń 2025 jylǵa deiingi Strategiialyq damý josparyna sáikes júzege asyrylady», - dedi QR Premer-Ministri.
