QR Ulttyq ekonomika ministri Áset Erǵaliev eń tómengi ailyqtyń salyqtyń mólsherine qalai áser etetinin aitty, dep habarlaidy QazAqparat.
Úkimet úiinde ótken brifingide Áset Erǵalievke BAQ ókilderi osyndai suraq qoiǵan bolatyn.
«Ózderińiz bilesizder, Memleket basshysy eń tómengi eńbekaqyny salyq jáne áleýmettik tólemderdi esepteý kórsetkishi retinde qoldanýdan ketýdi tapsyrǵan bolatyn. Biz bilemiz, búginde Salyq kodeksinde eń tómengi ailyq tek jeke tabys salyǵy men áleýmettik salyqtardyń eń tómengi kólemin eseptep shyǵarý standartyna ǵana bailanǵan. Ulttyq ekonomika ministrligi osy baǵytta jumys júrgizip jatyr. Jyl sońyna deiin bul jumysty aiaqtaimyz», - dedi vedomstvo basshysy.
Eske salsaq, atalmysh brifingide QR Qarjy ministri Erulan Jamaýbaev mobildi aqsha aýdarymdary qalai zańdastyrylatynyn túsindirdi.
«Bul jerde aita ketetin negizgi bir másele – halyq tarapynan alańdaý bolmaýy kerek. Sebebi azamattardyń qoldanyp júrgen karta shottary saqtalady. Olardyń kúndelikti ózara bir-birine aýdaryp júrgen aqshalaryna eshqandai nuqsan kelmeidi. Iaǵni, búkil protsess sol kúiinde saqtalady. Aldynda da aitqanymyzdai, mobildi aýdarymdardy fiskaldy etý úshin ǵana zańǵa birtindep ózgerister engizemiz. QR Ulttyq banki jinaqtap otyrǵan málimet boiynsha, 8 aida mobildik aýdarymdar arqyly jáne internet jelisi arqyly júrgizilgen aýdarymdar men tólemderdiń jalpy kólemi 36 trln teńgeniń mańaiynda qalyptasyp otyr. Bul óte qomaqty soma», - dedi Erulan Jamaýbaev.
