Tájikstan prezidenti Emomali Rahmon BUU Bas assambleiasynyń 76-sessiiasynda Aýǵanstan úkimetiniń quramyna osy eldi mekendegen ult ókilderi, sonyń ishinde aýǵan tájikteri de kirýi kerek dep málimdedi. Tájik prezidenti kórshi eldegi jaǵdaidy aimaq qaýipsizdigine tigizetin qaýip dep atady, dep habarlaidy Azattyq.
"Tájikstan Aýǵanstannyń ishki isine aralasqysy kelmeidi, biraq tájik biligi kórshi eldegi saiasi jáne qaýipsizdik máselelerin sheshý úshin inkliýziv úkimet qurylýy kerek dep esepteidi. Mundai úkimetke Aýǵanstandaǵy barlyq saiasi top, sonymen birge az ult ókilderi de kirýi tiis" dep málimdedi Emomali Rahmon.
"BUU Qaýipsizdik keńesi terrorshylar tizimine engizgen "Taliban" qozǵalysynyń bilikke kelýi aimaqtaǵy onsyz da kúrdeli geosaiasi úderisterdi odan saiyn qiyndatyp jiberdi" dedi tájik prezidenti.
Biyl jazda "Taliban" qozǵalysynyń (Joǵarǵy sot sheshimine sáikes, Qazaqstanda qozǵalysqa tyiym salynǵan) sodyrlary Aýǵanstandaǵy qalalardy basyp ala bastady. 15 tamyzda tálipter Kabýlǵa uryssyz kirdi. Prezident Ashraf Ǵani elden qashýǵa májbúr boldy. Tálipter Aýǵanstan islam ámirligin jariialaitynyn, ol shariǵat zańdaryna baǵynatynyn málimdedi. Birneshe aptadan soń tálipter óz úkimetin qurdy, biraq ony halyqaralyq qaýymdastyq moiyndaǵan joq.
Emomali Rahmon Aýǵanstandaǵy ózge ult ókilderiniń quqyqtary aiaqqa taptalyp jatqany týraly "úndemei otyrǵan" halyqaralyq adam quqyqtaryn qorǵaý uiymdaryn synady.
Tájikstan - Aýǵanstannyń táliptermen kelissóz júrgizgisi kelmeitin jalǵyz kórshisi. Dýshanbe tálipterdi Aýǵanstandaǵy etnikalyq toptardyń quqyqtaryn aiaqqa taptady dep esepteidi. "Taliban" basshylyǵy buny joqqa shyǵaryp otyr.
