«Emirates» áýe kompaniiasy Qazaqstanǵa turaqty reister ashýy múmkin. Bul týraly QR IIDM Azamattyq aviatsiia komiteti Feisbýktegi paraqshasynda jazdy, dep habarlaidy "Ult aqparat".
"Azamattyq aviatsiia komiteti Nur-Sultan qalasynyń jáne «Astana» halyqaralyq qarjy ortalyǵynyń kóliktik qoljetimdiligin arttyrý boiynsha jumystardy jalǵastyrýda.
Qazirgi ýaqytta Qazaqstan Respýblikasy men Birikken Arab Ámirlikteri arasyndaǵy turaqty áýe qatynasyn 4 áýe kompaniia («Eir Astana», «Etihad», «Fly Dubai», «Air Arabia») júzege asyryp keledi. Qazaqstandyq aviakompaniia aptasyna 12 ret Nur-Sultan, Almaty jáne Dýbai qalalary arasynda ushýlardy oryndaidy. BAÁ kompaniialarynyń ushaqtary Ábý-Dabi, Dýbai, Shardja jáne Nur-Sultan, Almaty qalalary arasynda aptasyna 16 ret qyzmet kórsetedi. Eki el arasynda aptasyna 28 reis oryndalady", - delingen taratylǵan aqparatta.
Vedomstvo aqparatyna səikes, QR IIDM Azamattyq aviatsiia Komitetiniń tóraǵasy Talǵat Lastaev Birikken Arab Ámirlikteriniń Qazaqstan Respýblikasyndaǵy Tótenshe jáne Ókiletti Elshisi Muhammed ál-Jabermen kezdesý ótkizdi.
Kezdesý barysynda eki el arasyndaǵy áýe qatynasyn odan ári keńeitý máseleleri talqylandy.
"Qazaqstan Respýblikasy men Birikken Arab Ámirlikteriniń aviatsiialyq bilik organdarynyń arasynda ekijaqty keńester ótkizý múmkindigi, sondai-aq «Emirates» áýe kompaniiasynyń Qazaqstanǵa turaqty reister ashý múmkindigi qarastyryldy.
Eki el arasyndaǵy áýe qatynasyn ári qarai keńeitý elder arasyndaǵy qarym-qatynastardy nyǵaitýǵa, sondai-aq týrizmdi tabysty damytýǵa yqpal etedi", - dedi komitetten.
