Portýgaliianyń Lissabon jáne Sintra qalalarynda qarashanyń 16-y men 25-i aralyǵynda ótken 12-shi halyqaralyq LEFFEST kinofestivaliniń jeńimpazdary anyqtaldy. Festivaldiń «Úzdik film» júldesi qazaqstandyq rejisser Emir Baiǵazinniń «Ózen» filmine buiyrdy. Atalǵan kinotýyndy festivaldiń negizgi konkýrsyna qatysyp, Eýropa, Aziia, Soltústik jáne Ońtústik Amerika elderiniń filmderimen úzdik atanýǵa talasty.
– Úzdik film úshin bas júldemen Emir Baiǵazinniń «Ózen» filmi marapattalady. Erekshe mánerde túsirilgen tamasha film. Bul týyndy bizdi ózektiligimen, joǵary deńgeiimen alǵashqy kadrdan-aq tańqaldyrdy, – dedi sahna tórinen qazylar alqasynyń múshesi Marta Argerih.
Aita ketsek, qazylar alqasynyń quramyna ónerdiń túrli salalarynda jumys isteitin qairatkerler kirdi, olar: Ýolter Salis jáne Djonatan Littel esimdi rejisserler, amerikandyq aktrisa jáne ánshi Krista Bell, argentinalyq pianist Marta Argerih, dirijer Sitven Kovachevich jáne sýretshi Djordj Kýeros.
Jalpy LEFFEST kinofestivalinde bar joǵy úsh júlde – «Úzdik film» (kino tilindegi eń innovatsiialyq jáne kórkem túsirilgeni úshin), «Qazylar alqasynyń úlken júldesi» (kórkemdik jaǵynan erekshelengeni úshin) jáne «Arnaiy júlde» tabystalady. Aita ketsek, Emir Baiǵazinniń «Aslannyń sabaqtary» filmi 2013 jyly festivaldiń «Qazylar alqasynyń úlken syilyǵy» júldesimen marapattalǵan bolatyn.
Sonymen qatar, festivaldiń marapattaý rásiminde «Álemdik kinematografqa qosqan úlesi» júldesi otandyq rejisser Dárejan Ómirbaevqa tabystaldy.
Aita keteiik, bul festivalde rejiserdiń retrospektivasy uiymdastyryldy.
Esterińizge sala ketsek, «Ózen» filminiń álemdik tusaýkeseri Venetsiia kinofestivali sheńberinde ótken bolatyn. Bul festivaldiń «Kókjiekter» baǵdarlamasynda Emir Baiǵazin úzdik rejisser atandy. Al filmniń Soltústik Amirikadaǵy tusaýkeseri biyl qyrkúiek aiynda Halyqaralyq Toronto kinofestivali aiasynda ótti. Kinotýyndy festivaldiń «Tuǵyrnama» («Platforma») konkýrstyq baǵdarlamasynda kórsetilip, qazylar alqasynyń qurmetti atalymyna jáne Screen Daily táýelsiz kinosynshylardyń reitingisi tiziminde aldyńǵy qatardan kórindi. Jyl saiyn ótetin 12-shi Asia Pacific Screen Awards saltanatynda «Ózen» filmi «Rejissýradaǵy tabysy úshin» syilyǵymen marapattaldy. Filmniń aziialyq tusaýkeseri
Tokio kinofestivaliniń konkýrstyq baǵdarlamasy aiasyndy ótti. Al Los-Andjelestegi Asian World Film Festival kinofestivalinde «Ózen» filmi qazylar alqasynyń júldesine – «kóńilińdi birden baýrap alatyn, naǵyz kino tilimen beinelengen film» júldesine ie boldy.
