Venetsiia kinofestivalindegi «Kókjiek» baǵdarlamasynda úzdik rejisser ataǵyn qazaqstandyq Emir Baiǵazin jeńip aldy, dep habarlaidy "Ult aqparat".
Festivalde qazaqstandyq rejisser basty keiipkeri Aslannyń trilogiiasyn aiaqtaityn "Ózen" atty filmin usynǵan. Alǵashqy eki bólimi - "Aslannyń sabaqtary" men "Jaraly perishte" filmderi 2013 jáne 2016 jyldary Berlin kinofestivalinde resmi kórsetilgen edi.
"Ózen" filmi shalǵaida ómir súretin bes aǵaiyndynyń qaladan qonaq kelgen soń ómirleriniń qalai ózgergendigin kórsetedi. Filmniń túsirilimi Túrkistan oblysynda ótken. Basty rólderdi Qazaqstannyń ár buryshynan jinalǵan áýesqoi ártister somdady.
Baiqaýdyń basty jeńimpazy meksikalyq rejisser Alfonso Kýaronanyń "Roma" filmi boldy. "Aǵaiyndy Sisters" filmin túsirgen Jak Odiiar úzdik rejisser ataǵyn ielendi. Gran-pridi tóreshiler "Favorit" filmin túsirgen grek Iorgýs Lantimosqa tabystady. Úzdik akter ataǵyn "Van Gog: Máńgilik tabaldyryǵynda" filmine túsken Ýillem Defo alsa, "Favorit" filminde oinaǵan Oliviia Kolman úzdik aktrisa bop tanyldy.
Sondai-aq, jalpy kinofestivalde «Árýaq» (rej. H.Ahmetov), «Ámire» (rej. D.Vespa), «Talan» (rej. B.Qalymbetov), «Ol» (rej. A.Sataev), «Almas qylysh» (rej. R.Ábdrashev), «Anaǵa aparar jol» (rej. A.Sataev), «Oralman» (rej. S.Qurmanbekov), «Bizdiń qalanyń kishkentai hanzadasy» (rej. T.Temenov), «Shyńyraý» (rej. J.Jetirýov), «Jat» (rej. E.Tursynov) kórkem filmderi men «Kúltegin» (rej. A. Ábildinov), «Jumper» (rej. Arman Beisembaev) jáne «Muzbalaq» (rej. T.Maidan, T.Tóleýǵazy) syndy otandyq animatsiialyq filmderdiń treilerleri kórsetildi.
Aita keteiik, «Kókjiek» baǵdarlamasy Venetsiia kinofestivaliniń negizgi konkýrsynan keiingi mańyzǵa ie baiqaý.
