Densaýlyq saqtaý ministri Eljan Birtanov elimizde koronavirýs infektsiiasynyń aldyn alý jumystary qalai júrgizilip jatqanyn aityp berdi, dep habarlaidy QazAqparat.
«Bárińiz biletindei, Tokiodaǵy lainerde bizdiń de azamattar bar bolyp shyqty. Olar kóp ýaqyt sol jerde karantinde bolyp, Japoniia memleketiniń densaýlyq saqtaý ministrliginiń virýs juqtyrmaǵan degen qaǵazyn aldy. Sosyn olar Skat áýe kompaniiasynyń ushaǵymen elge jetý úshin Qazaqstanǵa ushqan. Osy kezde biz Izrail, Avstraliia, AQSh elderinen qosymsha aqparat aldyq. Bilgenimizdei sol kemeden buryn saý dep túsken azamattardyń arasynda koronavirýs juqtyrǵandary anyqtalǵan. Ókinishke qarai, biz bul jaǵdai boiynsha Japoniia memlekettik qyzmetterinen eshqandai aqparat alǵan joqpyz. Sonymen memlekettik organdarmen aqyldasyp, tiisti sheshim qabyldap, ushaqpen kelgen basqa da jolaýshylar men ekipaj múshelerin karantinge jatqyzdyq», - dedi Eljan Birtanov «Habar 24» arnasyna bergen suhbatynda.
Ministrdiń aitýyna qaraǵanda, Tokiodan ushyp kelgenderdiń bári de arnaiy meditsinalyq mekemege jatqyzylǵan. Qajetti tekserister ótkennen keiin olar úilerine qaitarylmaq.
«Olar naýqas adamdar emes – saý adamdar. Biraq qaýipsizdik máselesi óte ózekti. Ushyp kelgenderdiń týystaryn, jaqyndaryn qorǵaý úshin biz osyndai sheshim qabyldap otyrmyz. Bul sheshim zańdy túrde qabyldanǵan. Bas sanitarlyq dárigerdiń karantin engizýge zań boiynsha quqyǵy bar», - dedi ol.
Eljan Birtanov Tokiodan ushyp kelgenderdiń ishinde shetel azamattary da baryn aityp ótti.
«Sheteldikter de karantin talaptaryna baǵyndy. Áli tolyq diagnostika ótken joq. Karantin aiaqtalǵannan keiin olar da qaitarylady. Bul – basqa memleketterde de kúndelikti bolyp jatqan jaǵdai. Mysaly Japoniiadan, Koreiadan kelip jatqan azamattarǵa qatysty osyndai karantin engizilýde. Árine jalpy dúniejúzi osyndai qiyn jaǵdaida. Árbir memleket óziniń zańy boiynsha azamattaryn qorǵaýda. Bizdiń de negizgi maqsatymyz – halyqtyń densaýlyǵy. Eshqandai qaýip joq. Tek karantin. Osy ýaqytqa deiin Ýhannan 300-ge tarta óz azamattarymyzdy, basqa sheteldik azamattardy ákelip, karantinnen ótkizdik. Eshqandai koronavirýs tabylǵan joq. Bári úilerine tarap ketti. Qazir de Qytaidan keletin azamattarǵa karantin engiziletin bolady. 20 aqpannan bastap 160 adam karantinde jatyr. Olardyń ishinde otandastarymyzben birge QHR-dyń da, basqa elderdiń azamattary bar», - dedi ol.
Eske sala ketsek búgingi Úkimet otyrysynda da Eljan Birtanov Japoniiadaǵy lainerde bolǵan 4 qazaqstandyq jáne olarmen birge Tokiodan ushyp kelgen azamattar karantinde jatqanyn málim etken edi.
