Adam quqyqtary jónindegi ýákil Elvira Ázimova Atyraý qalasyndaǵy sport zalda qamaýda bolǵandardyń quqyqtary qalai buzylǵanyn aitty, dep habarlaidy QazAqparat.
«Sonymen birge Atyraý qalasynda ýaqytsha ustaý orny retinde paidalanylǵan sport zalda bolǵan oqiǵalarǵa bailanysty qala turǵyndarymen kezdesý ótkizdim. Negizinde Tótenshe jaǵdai rejimi Qazaqstanda 5-19 qańtar aralyǵynda engizilgen. Osyǵan bailanysty tiisti zańda komendanttyń qoǵamnan ýaqytsha oqshaýlaýdy qamtamasyz etetin arnaiy mekemelerdegi oryndar jetkiliksiz bolǵan jaǵdaida Tótenshe jaǵdai rejimin buzýshylardy ustaý úshin qosymsha oryndar belgileý quqyǵy qarastyrylǵan. Biraq qamaýda ustaý jaǵdaiynda adam quqyqtaryn saqtaý talabyn zań joimaitynyn este ustaýymyz kerek», - dedi ol «Habar-24» telearnasynda ótken brifingide.
Aitýynsha, atalmysh orynda keibir azamattarǵa qysym arqyly qujattarǵa qol qoiǵyzý faktileri tirkelgen.
«Osy orynda qamaýda ustalǵan azamattar uryp-soǵý, qysym kórsetý saldarynan protsessýaldyq qujattarǵa qol qoiýǵa májbúr bolǵan. Advokattarǵa aýyzsý men tamaqqa qoly jetpegenin, dene jaraqattaryn alýyna bailanysty meditsinalyq kómek kórsetilmegenin habarlady. Qazirgi ýaqytta bul fakt Ishki ister ministrliginiń jeke baqylaýyna alynyp, vedomstvonyń ishki qaýipsizdik qyzmeti tekserý jumystaryn bastady», - dedi Adam quqyqtary jónindegi ýákil.
