ادام قۇقىقتارى جٶنٸندەگٸ ۋەكٸل ەلۆيرا ەزٸموۆا اتىراۋ قالاسىنداعى سپورت زالدا قاماۋدا بولعانداردىڭ قۇقىقتارى قالاي بۇزىلعانىن ايتتى, دەپ حابارلايدى قازاقپارات.
«سونىمەن بٸرگە اتىراۋ قالاسىندا ۋاقىتشا ۇستاۋ ورنى رەتٸندە پايدالانىلعان سپورت زالدا بولعان وقيعالارعا بايلانىستى قالا تۇرعىندارىمەن كەزدەسۋ ٶتكٸزدٸم. نەگٸزٸندە تٶتەنشە جاعداي رەجيمٸ قازاقستاندا 5-19 قاڭتار ارالىعىندا ەنگٸزٸلگەن. وسىعان بايلانىستى تيٸستٸ زاڭدا كومەندانتتىڭ قوعامنان ۋاقىتشا وقشاۋلاۋدى قامتاماسىز ەتەتٸن ارنايى مەكەمەلەردەگٸ ورىندار جەتكٸلٸكسٸز بولعان جاعدايدا تٶتەنشە جاعداي رەجيمٸن بۇزۋشىلاردى ۇستاۋ ٷشٸن قوسىمشا ورىندار بەلگٸلەۋ قۇقىعى قاراستىرىلعان. بٸراق قاماۋدا ۇستاۋ جاعدايىندا ادام قۇقىقتارىن ساقتاۋ تالابىن زاڭ جويمايتىنىن ەستە ۇستاۋىمىز كەرەك», - دەدٸ ول «حابار-24» تەلەارناسىندا ٶتكەن بريفينگٸدە.
ايتۋىنشا, اتالمىش ورىندا كەيبٸر ازاماتتارعا قىسىم ارقىلى قۇجاتتارعا قول قويعىزۋ فاكتٸلەرٸ تٸركەلگەن.
«وسى ورىندا قاماۋدا ۇستالعان ازاماتتار ۇرىپ-سوعۋ, قىسىم كٶرسەتۋ سالدارىنان پروتسەسسۋالدىق قۇجاتتارعا قول قويۋعا مەجبٷر بولعان. ادۆوكاتتارعا اۋىزسۋ مەن تاماققا قولى جەتپەگەنٸن, دەنە جاراقاتتارىن الۋىنا بايلانىستى مەديتسينالىق كٶمەك كٶرسەتٸلمەگەنٸن حابارلادى. قازٸرگٸ ۋاقىتتا بۇل فاكت ٸشكٸ ٸستەر مينيسترلٸگٸنٸڭ جەكە باقىلاۋىنا الىنىپ, ۆەدومستۆونىڭ ٸشكٸ قاۋٸپسٸزدٸك قىزمەتٸ تەكسەرۋ جۇمىستارىن باستادى», - دەدٸ ادام قۇقىقتارى جٶنٸندەگٸ ۋەكٸل.
