Qazaqstan Respýblikasy memlekettik Eltańbasynyń avtory Shot-Aman Ýálihanov 88 jasynda dúnieden ótti. Qaraly habardy mádeniet jáne sport ministri Aqtoty Raiymqulova jetkizdi, dep habarlaidy "Ult aqparat".
Raiymqulova Qazaqstan mədeniet jəne sport ministrliginiń atynan Shot-Aman Ýálihanovtyń qaitys bolýyna bailanysty otbasy men jaqyndarynyń qaiǵysyna ortaqtasyp, kóńil aitty.
«Shot-Aman Ýálihanovtyń otbasy men týǵan-týystaryna!
Qazaqstan Respýblikasy Mədeniet jəne sport ministrliginiń atynan kórnekti sáýletshi, professor, Qazaqstannyń eńbek sińirgen qairatkeri, «Qurmet», «Parasat», «Otan», «Dańq» ordeniniń iegeri, Qazaqstan Respýblikasy memlekettik Eltańbasynyń avtory, Təýelsiz «Tarlan» syilyǵynyń laýreaty, QR səýletshiler, dizainerler, jazýshylar sýretshiler odaǵynyń múshesi, búkilálemdik Shyńǵys han akademiiasynyń, Shyǵys elderi Halyqaralyq sáýlet akademiiasynyń, halyqaralyq səýlet akademiiasynyń akademigi (Resei Federatsiiasy) Shot-Aman Ydyrysuly Ýálihanovtyń qaitys bolýyna bailanysty otbasy men jaqyndarynyń qaiǵysyna ortaqtasyp, kóńil aitamyn.
Shot-Aman Ydyrysuly sanaly ǵumyryn súiikti isine arnap, maǵynaly ómir súrgen óz ortasyna syily, bolmysy bólek jan edi.
Ol halqymyzdyń tarihyndaǵy ardaqty tulǵalardyń eskertkishin jasap, er esimin el arasynda ulyqtaýǵa, sáýleti kóz tartar ǵimarattardyń boi kóterýine súbeli úles qosty.
Bul qatarda elorda tórindegi Kenesary Qasymuly, Qostanai qalasyndaǵy Ahmet Baitursynuly, Ereimentaýdaǵy Bógenbai batyrdyń, ShQO-daǵy hakim Abai men Shákárimniń, Almatydaǵy Shoqan Ýálihanov, Dina Nurpeiisova, Əlibi Jangeldin, Toqash Bokin, Ǵani Muratbaev, Nurmolda Aldabergenov, Talǵat Bigeldinov, Jumaǵali Sain, Taiyr Jarokov, Tahaýi Ahtanov, Əbý Sərsenbaev, Dinmuhamed Qonaev, Tiles Qajyǵaliev, Qurmanai Omarova, Nurǵali Tasmaǵambetov, Shafik Chokinge arnalǵan týyndyny halyq jaqsy biledi. Sol siiaqty Almatydaǵy «Dinamo» stadiony, Almaty qalasy əkimdiginiń, qazaq-nemis ýniversiteti ǵimaratynyń, Qaraǵandydaǵy Kosmonavtika monýmenti syndy eńseli nysannyń jobasyn jasady.
Segiz qyrly, bir syrly aǵamyz elimizdiń sáýlet jáne beineleý óneriniń ózekti máselelerin kótergen kóptegen ǵylymi maqalamen qatar birqatar dramalyq shyǵarma jazdy. Olardyń qatarynda «Taǵdyr», «Shoqannyń anty», «Aqnur», «Shoqannyń aq túnderi», «Terror» atty pesasy bar.
Ǵibratty azamattyń asyl beinesi, eren eńbegi týǵan-týys pen qalyń qazaqtyń kóńil tóri men júrek túkpirinde məńgi saqtalady.
Marqumnyń kózi tirisinde jasaǵan igi-jaqsy amaldary aldynan jarylqasyn. Jatqan jeri jaily, topyraǵy torqa, aldy peiish, arty kenish bolsyn!», - dep jazdy ministr óziniń Instagram paraqshasynda.
Aita keteiik, Shot-Aman Ýálihanov 1932 jyly Soltústik Qazaqstan oblysy Aiyrtaý aýdany Syrymbet aýylynda týǵan.
1956 jyly Máskeý memlekettik sáýletshi institýyn bitirgen.
