Ońtústik Koreiada eki myńǵa jýyq qazaqstandyq zańsyz júr. Bul týraly búgin Astanadaǵy baspasóz máslihatynda Koreia Respýblikasyndaǵy Qazaqstannyń Tótenshe jáne Ókiletti Elshisi Dýlat Baqyshev málim etti, dep habarlaidy Ult.kz tilshisi QazAqparat agenttigine silteme jasap.
«Qazirgi kezde Ońtústik Koreiada Qazaqstannan barǵan eki myńǵa jýyq adam zańsyz júr. Jalpy, basqa elderden de adamdar osy memleketke baryp, qalyp jatyr», - dedi ol.
Onyń sózine qaraǵanda, sońǵy kezde keibir qazaqstandyqtar Koreiaǵa vizasyz barý múmkindigin paidalana otyryp, sonda qalyp jatyr.
«Osyǵan bailanysty zań buzýshylyqqa barǵandardy anyqtaý boiynsha kúsheitilgen jumystar qolǵa alyndy. Kez kelgen jaǵdaida, iaǵni adamnyń áreketi durys nemese burys bolsa da, elshiliktiń maqsaty bizdiń azamattardyń múddeleri men quqyqtaryn qorǵaýǵa bailanysty bolady. Bizdiń elshilikte tórt diplomat, bir konsýl jumys isteidi. Konsýlymyz demalyssyz jumys isteitinin aita ketken jón. Ol kúnde áýejaida bolady. Sonymen qatar adamdar emdelý úshin de osy elge barady. Sondyqtan diplomattardyń jumysy qarqyndy», - dedi Elshi.
Onyń aitýynsha, apta saiyn problemalar týyndaidy. Árbir oqiǵa boiynsha Ońtústik Koreia syrtqy ister ministrligine nota jiberilip, oqiǵanyń mán-jaiyn anyqtaimyz. Sondai-aq keibir máseleler sol jerde sheshilip jatady.
«Bizdiń maqsat Qazaqstan azamattarynyń múddeleri men quqyqtaryn qorǵaýǵa negizdelgen. Kóp jaǵdailarda adamdardy negizdi sebeptermen ustaidy, sebebi olar óziniń sapary týraly tolyq aqparat bermeidi»,-dep túsindirdi Baqyshev.
