Elordanyń negizgi nysandary óz ataýyn saqtap qalady, dep habarlaidy QazAqparat agenttigi.
Bul týraly QR Aqparat jáne qoǵamdyq damý ministri Dáýren Abaev "Ashyq dialog" baǵdarlamasynda aitty.
Ministr Prezident Qasym-Jomart Toqaevtyń alǵashqy sózinde elorda ataýyn ózgertýge naqty negizdeme keltirgenin atap ótti.
"Astananyń ataýyn ózgertý ózgeler oilaǵandai radikaldy túrde júrgizilmeidi. Eń aldymen ákimdik memlekettik biýdjetke salmaq túsirmeitin joldy tańdaidy. Eshkim bannerler men jazbalardy bir kúnde ózgert dep otyrǵan joq. Bulai bolmaidy. Qalanyń negizgi nysandary - "Astana Opera", "Astana Arena", sporttyq klýbar, "Astana" telearnasy - óz ataýyn ózgertpeidi. "Astana" halyqaralyq brendin saqtap qalamyz", - dedi Dáýren Abaev "Ashyq dialog" baǵdarlamasynda.
Onyń aitýynsha, Astana qarjy ortalyǵy, "Eir-Astana" áýe kompaniiasy, "Astana" velokomandasy, "Astana Arlans" ataýlary da ózgerissiz qalady. Osylaisha, álemge tanymal "Astana" brendin saqtap, zor áleýeti bar jańa Nur-Sultan brendin damytý kerek.
"Astana" sózi biz úshin yńǵaily. Sebebi onyń maǵynasy da astanany bildiredi.
Memlekettik tilde elorda turǵyndaryn astanalyqtar dep atai beremiz. Orys tilinde de osylai ataýdy usynamyz. Sosyn elordanyń eski ataýy bar resmi qujattar zańdyq kúshin joǵaltpaidy. HQO-ǵa baryp, ózgertýdiń qajeti joq. Qujattyń qoldaný merzimi bitken soń, jańa qujat jańa qala ataýymen beriledi", - dedi ministr.
