Birgemiz qorynan tólenetin tólemder jeti sanattaǵy azamattarǵa tiesili.
Nur-Sultan qalasynda «Biz birgemiz» aktsiiasy aiasynda 28 073 adam qamtylatyn kómektiń ekinshi kezeńi bastaldy. Atap aitqanda, azamattardyń jeti sanaty 50 myń teńge kóleminde kómek alady. Olar AÁK alatyn az qamtylǵan otbasylar, eń tómengi zeinetaqy alatyn zeinetkerler, birinshi nemese ekinshi toptaǵy múgedektigi bar zeinetkerler, jetim balalar, soǵys ardagerleri jáne olarǵa teńestirilgen azamattar, sondai-aq qaraýynda múgedek balalary bar otbasylar jáne tyl eńbekkerleri.
«Atalǵan kómek ár otbasyna bir ret ǵana beriledi. Iaǵni, bir ret kómek alǵan adamdar ekinshi márte ala almaidy. 28073 adam - atalǵan kómekke muqtaj alǵashqy kezeńde qamtylǵandardan ózge adamdar», – dep habarlady Nur-Sultan qalasynyń halyqty jumyspen qamtý jáne áleýmettik qorǵaý basqarmasy basshysynyń orynbasary Aigerim Táńirbergenova.
«Biz birgemiz» aktsiiasy aiasynda kómektiń alǵashqy tolqyny barysynda elordanyń 14 478 turǵyny 50 myń teńge kóleminde qarjylai kómek alǵan bolatyn.
«Eshkimge ótinim berýdiń qajeti joq. Biz barlyq málimetterdi Áleýmettik tólemderdiń vedomstvoaralyq esep aiyrysý ortalyǵynyń derekter qorynan áleýmettik qorǵaý basqarmasy arqyly alamyz. Iaǵni, eger adam elordada resmi tirkelse, járdemaqy, zeinetaqy, AÁK jáne basqa da memlekettik járdemaqy túrinde qandai da bir tólem alatyn bolsa, ol avtomatty túrde bizdiń tizimge enedi», – dep túsindirdi Nur Otan qalalyq partiiasy filialy tóraǵasynyń birinshi orynbasary Erlan Kanalimov.
Esterińizge sala keteiik, azyq-túlik sebetterin alýǵa ótinimdi partiianyń qoǵamdyq qabyldaýy arqyly berýge bolady.
