Elordany tolyǵymen gazdandyrý 2025 jyly aiaqtalady dep josparlanǵan. Alaida bul másele mejeli ýaqyttan eki jyl erte sheshilýi múmkin. Bul týraly Nur-Sultan qalasy ákiminiń orynbasary Altynbek Qaisaǵaliev málim etti, dep habarlaidy QazAqparat.
«Nur-Sultan qalasynda 22 myńnan astam turǵyn úi bar. Sonyń bári tabiǵi gazǵa aýystyrylady. Qazir olar janar-jaǵarmai arqyly nemese kómirmen jylytylyp otyr. Iaǵni aýaǵa shyǵarylatyn ziiandy zattar óte kóp. Úsh kezeńnen turatyn qalany gazdandyrý baǵdarlamasy qabyldanǵan. Úsh kezeńniń birinshisine kirisip kettik. Birinshi kezeńniń ózi 9 iske qosý kesheninen turady. Onyń bári boiynsha konkýrstyq protsedýralar ótip, búgingi kúni merdiger kompaniialar belgilenip, qurylys jumystary bastalyp ketti», - dedi «ASTANA TV» telearnasyndaǵy Elorda live-ta bergen suhbatynda.
Qala ákiminiń orynbasarynyń aitýynsha, josparǵa sáikes 2025 jylǵa deiin Nur-Sultan qalasyn tolyǵymen gazben qamtý jospary bar.
«Degenmen, búgingi kúni jumys qarqyndy júrgizilip jatqandyqtan, qarajat ýaqytynda bólinip, ister tyndyrylatyn bolsa – 2023 jylǵa deiin úsh kezeń boiynsha jumysty tolyqtai aiaqtaǵymyz kelip otyr», - dedi ol.
Sonymen qatar, ol biyl qalanyń qai turǵyn úi alaptaryna gaz qosylatynyn aityp ótti.
«Nur-Sultan qalasyna alǵashqy gaz biyl Kóktal-1, Kóktal-2, Agroqalashyq turǵyn alaptaryn gazben birinshi kezeńde qamtityn bolamyz. Biyl sonymen qatar jeke turǵyn úiler de gazǵa qosylady. Odan bólek osy jyly gazǵa qosylatyn memlekettik jáne memlekettik emes áleýmettik nysandar da bar. Bul keshendi túrde júrgiziletin jumys», - dedi Altynbek Qaisaǵaliev.
