Elordany gazdandyrý aýaǵa taralatyn ziiandy shyǵaryndylardy 40 myń tonnaǵa qysqartýǵa múmkindik beredi. Bul týraly «Astana» telearnasyna suhbat bergen elorda ákimi Altai Kólginov aitty, dep habarlaidy QazAqparat.
«Ózderińiz de biletindei, gazdandyrý - bul tarihi sát, óte mańyzdy joba. Elbasy muny osydan birneshe jyl buryn jariia etken bolatyn. Endi mine, magistraldy gaz qubyry salyndy. Prezident bul máseleni jeke baqylaýynda ustap otyr. Elordany damytý jónindegi keńeste Memleket basshysy bul jumysty sapaly júrgizýdi tapsyrǵan bolatyn. Ótken jyl kúrdeli boldy. Óitkeni, sotpen bailanysty aitys-tartys boldy. Al qazir kesteni qýyp jettik jáne taratý jelileri salynyp jatyr. JES-1 men JES-2-ni jańa jylý berý maýsymynda, kúzde iske qosýǵa tiispiz. Bul baǵytta qazir qarqyndy jumys istep jatyrmyz», - dedi Altai Kólginov.
Qala basshysynyń aitýynsha, kestege sáikes jeke sektorlardyń ishinde eń aldymen Kóktal-1 jáne Kóktal-2 turǵyn úi alabyndaǵy turǵyndarǵa kógildir otyn jetkiziledi.
«Qazirgi ýaqytta aýyldyń ishine kirdik jáne jazda alǵashqy áleýmettik nysandarǵa gaz qosýdy josparlap otyrmyz. Olar: mektepter, qarttar úii, áleýmettik nysandar. Odan keiin Jeleznodorojnyi eldi mekenine gaz tartylady. Osy rette nelikten jeke sektordan bastaǵymyz kelip otyrǵandyǵyn túsindire keteiin. Birinshi kezekte, bizge ekologiiany jaqsartý qajet. Jelsiz aýa raiy kezinde, barlyǵy pesh jaqqanda búkil jeke sektordy tútin basyp ketedi», - dedi elorda ákimi.
Onyń atap ótýinshe, elorda ekologiiasyn jylý elektr stansalary, jeke turǵyn úilerde qysta jaǵylatyn otyn jáne avtomobilder buzyp otyr.
«Karantin aýanyń tazara túskendigin kórsetti. Botanikalyq baqta aqqýlar paida boldy. Buryn bolǵan emes edi. Ministrler úiiniń janynda qoiandar júr. Munyń barlyǵy tabiǵattyń qalai jandanǵanyn kórsetip otyr. Mine osydan qorytyndy shyǵarýymyz kerek», - dedi ol.
Altai Kólginovtiń dereginshe, elorda gazdandyrý aýaǵa taralatyn ziiandy shyǵaryndylardy 40 myń tonnaǵa qysqartýǵa múmkindik beredi.
