Nur-Sultan qalasynyń ustazdary «Pedagog mártebesi týraly» jańa zańdy talqylady, dep habarlaidy "Ult aqparat".
№ 77 mektep-gimnaziiada ótken dóńgelek ústel otyrysyna qala ákiminiń orynbasary Baqtiiar Máken, elordalyq bilim berý uiymdarynyń basshylary men pedagogtary, «Ádilet» bilim berý qyzmetkerleri kásipodaǵynyń jáne ata-analar qaýymdastyqtarynyń músheleri qatysty.
Sharaǵa qatysýshylardyń biri, №22 «Álem» balabaqshasynyń ádiskeri Olga Geleveria tárbieshiler quqyǵy muǵalimdermen teń dárejede ekendigin atap ótti. Bul, pedagogikalyq sheberligi úshin aqy tóleý jáne demalys merziminiń uzarýynan kórinis taýyp otyr.
«Zańda pedagogtar jalaqysyn osy jyldan bastap 25% arttyrý qarastyrylǵan. Bul, qýanyshty habar. Sebebi mektepke deiingi uiymdardaǵy pedagogtardyń jalaqysy joǵary emes. Sonymen qatar, tárbieshilerge pedagogikalyq sheberligi úshin jalaqy kólemine sai 30%-dan 50%-ǵa deiin aqy tólenetin bolady. Qazirgi kezde tárbieshiler muǵalimdermen teń quqyly. Sondai-aq, mektepke deiingi uiymdar ustazdaryna demalys merzimi 56 kúnge deiin uzardy. Odan bólek, pedagogtarǵa negizsiz til tigizgeni úshin aiyppul qarastyrylǵan», - dedi Olga Geleveria.
Sondai-aq, jańa zań týraly pikirimen Kólik jáne kommýnikatsiia kolledjiniń direktory, máslihat depýtaty Zýlfýhar Gaipov bólisti.
«Zańnyń 8-babynyń 4-tarmaǵy kóńilimizden shyqty. Onda negizgi jumys orny memlekettik mekeme bolatyn pedagogtarǵa filosofiia ǵylymdarynyń doktory dárejesi, sondai-aq ǵylym kandidaty ǵylymi dárejesi úshin 17 AEK (45 myń teńge), ǵylym doktorlaryna 34 AEK (90 myń teńge) kóleminde aqy tólenedi dep aitylǵan. Bul pedagogtar úshin úlken yntalandyrý», - dedi ol.
Qala ákimi orynbasarynyń aitýynsha, «Pedagog mártebesi týraly» zań – pedagogikalyq qaýymdastyqtyń bedeli men elimizdegi árbir pedagogtyń rólin nyǵaitýǵa baǵyttalǵan mańyzdy qadam.
«Pedagogtardyń jaǵdaiyn jaqsartatyn barlyq normalar bekitildi. Mamandyq jastar men óskeleń urpaq úshin tartymdy bolady. Qazirgi ýaqytta kadrlardyń jetispeitinin eskersek, bul ózekti másele. Bul zań jastardy yntalandyrýǵa múmkindik beredi», - dedi Baqtiiar Máken.
Ákim orynbasary zańda pedagogtardyń kásibi qyzmetindegi quqyqtary men mindetteri egjei-tegjeili kórsetilgenin, sondai-aq materialdyq qamtamasyz etý, kótermeleý men áleýmettik kepildikterge qatysty normalardy qamtitynyn atap ótti.
«Pedagogtarǵa halyqaralyq olimpiada júldegerleri úshin úsh laýazymdyq jalaqy mólsherinde bir jolǵy syiaqy túrinde kótermeleý qarastyrylǵan. Sondai-aq, aýyldyq jerlerdegi oqytýshylarǵa jer ýchaskesine basym quqyq berilgen. Árbir bap normativtik-quqyqtyq aktilermen bekitilgen. Olar is júzinde oryndalady, qaǵaz betinde qalmaidy. Atalmysh normalar balalarmen jumys isteitin barlyq tulǵalarǵa qatysty», - dedi ol.
Óz baiandamasyn Baqtiiar Máken uly aqyn Abai Qunanbaevtyń qara sózimen qorytyndylady. «Memleket basshysy Qasym-Jomart Toqaevtyń «Abai jáne HHI ǵasyrdaǵy Qazaqstan» atty maqalasy jaryq kórdi. Maqala óz ýaqytynda der kezinde shyqty jáne mańyzdy dep sanaimyn. Sebebi, uly aqynnyń arqasynda biz búginde ustazdyqtyń jaqsylyǵyn túsinip otyrmyz. Ol kisiniń «Adamnyń adamgershiligin jaqsy ustazynan bilýge bolady» degen jaqsy sózi bar», - dep sózin túiindedi ákim orynbasary.
Aita ketsek, «Pedagog mártebesi týraly» QR zańy 2019 jyldyń 30 jeltoqsanynda qabyldandy.
