Nur-Sultan qalalyq Politsiia departamentiniń jeke quramy qala shetinde oqý-jattyǵý jiynyn ótkizdi, dep habarlaidy QazAqparat.
Jeke quram qaladan shamamen 30 shaqyrym jerdegi oqý-jattyǵý poligonynda kúndelikti daiyndyq jumystaryn júrgizedi eken. Aldymen, asa qaýipti qylmyskerlerdi ustaýǵa beiimdelgen Politsiia departamentiniń Arnaiy maqsattaǵy bólimshesi alys jáne jaqyn qashyqtyqta nysana kózdedi. Zamanǵa sai jaraqtanǵan sarbazdardyń birin sózge tarttyq. Basshylyqtyń buiryǵyna sai, betperdesin sheshe almaitynyn jáne aty-jónin atai almaitynyn túsindirgen qyzmetker, óz oiymen bólisýden qashqan joq.
«Búgin atystan daiyndyq jumystaryn pysyqtap, jeke jáne top quramynda daiarlyǵymyzdy shyńdadyq. Sonymen birge, kólik quralyn, máselen, avtobýsty lańkester basyp alǵan jaǵdaida eshbir adam zardap shekpeitindei maqsatty kózdep, daǵdymyzdy tekserip kórdik. Ondai jaǵdaida qylmyskerdi esh qurbansyz ustaý mindeti qoiylady. Bólimshemizdiń mindeti – departamenttiń, IIM basshylyǵynyń buiryǵyn buljytpai oryndaý. Mundai oqý-jattyǵý jumystaryn kún saiyn júrgizemiz. Sonymen birge, deneni qalypta ustaýǵa, onyń daiarlyǵyna erekshe mańyz beriledi», - deidi ol.
Sarbazdyń aitýynsha, qyzmet babynda qarapaiym azamattarǵa qaýip tónetin jaǵdailar jii kezdesip jatady. Máselen, byltyr elordada lombardtardyń birine qylmysker tap berip, sondaǵy qyzmetker áieldiń ómirine qaýip tóndirgen. Alaida saq sarbazdardyń arqasynda eshkim zardap shekpei, qylmysker qolǵa túsken.
Oqý-jattyǵý jumysyna kinologtar da keldi. Departamentke qarasty Kinologiialyq qyzmet ortalyǵynan áskeri mamandar «Vektor» men «Kýba» atty eki it alyp kelgen. Olarmen jumys isteitin mamandardyń aitýynsha, qyzmettik itterdiń ózi birneshege bólinedi. «Vektor» men «Kýba» qylmys kezinde kúdiktilerdi ustaityn «shabýyldaýshy» itter eken.
«Vektor» men «Kýba» qashyp bara jatqan qylmyskerdi qalai ustaý kerektigin kórsetti. Arnaiy qalyń kiim kiip, qasha jónelgen sarbazǵa birden jetken itter kez kelgen kúdiktiniń qutyla almaitynyn dáleldedi.
